लिम्चुङबुङमा बाल संजाल तथा बाल क्लबलाई दिईयो स्वास्थ्य अभिमुखीकरण

चैत्र २२, सोलुखुम्बु । उदयपुरको लिम्चुङबुङ गाउँपालिका वडा नम्बर ५ जाँतेमा बाल संजाल तथा बाल क्लबलाई स्वास्थ्य अभिमुखीकरण कार्यक्रम प्रदान गरिएको छ । शुक्रबार पालिकाको स्वास्थ्य शाखाको आयोजनामा बालबालिकाहरुलाई बाल अधिकार, किशोरी मैत्री, बालमैत्री स्थानीय शासनको बारेमा अभिमुखिकरण कार्यक्रम आयोजना गरिएको बालमैत्री स्थानीय शासन फोकल पर्सन मिलन परियारले जानकारी दिनुभयो ।

अभिमुखिकरण कार्यक्रममा स्वास्थ्य शाखा प्रमुख कर्णशेर राईले बालबालिकाहरुले आफ्नो अध्ययनलाई ध्यान दिनुपर्ने, लागु औषधको प्रयोग नगर्ने, विवाह योग्य उमेर पुगेपछि मात्र विबाह गर्ने, बाल विवाहले व्यक्ति, परिवार तथा समाजमा नकारात्मक प्रभाव पार्ने, बालविवाहमा सहभागी हुन नहुने, बालविवाह गैरकानुनी भएको र यसलाई रोक्न सबैको सहयोग आवश्यक पर्नेमा जोड दिनुभएको थियो ।

पछिल्लो समयमा किशोर किशोरीहरुको आत्महत्याको दर बढ्दै गएको र यसको लागि सबैले मानसिक स्वस्थको लागि गर्नुपर्ने काम र आफ्नो विकासको लागि सोच्नु पर्ने बताउनुभयो । लिम्चुङबुङ गाउँपालिका वडा नम्बर ५ का वडा अध्यक्ष कबिचन्द्र राईको अध्यक्षतामा संचालन गरिएको कार्यक्रममा ६७ जनालाई बालबालिकाहरुको उपस्थिती रहेको आयोजकले जनाएको छ ।