चैत्र २३, सोलुखुम्बु । ओखलढुगांको चिशंखुगढी गाउँपालिकामा तेस्रो चिशंखुगढी कप अन्तरपालिका स्तरीय खुला पुरुष भलिबल प्रतियोगिता हुने भएको छ । गाउँपालिकाले खेलकुदको माध्यमबाट सामाजिक सदभाव, सहिष्णुता तथा आपसी हार्दिकता कायम राख्दै युवाहरुमा रहेको खेल प्रतिभालाई उजागर गर्ने उदेश्यले उक्त प्रतियोगिता आयोजना गर्ने भएको हो ।
आउँदो बैशाख १६ गतेबाट सुरु हुने प्रतियोगिता स्थानीय, प्रादेशिक, राष्ट्रिय तथा अन्तराष्ट्रिय स्तरको खेलाडी उत्पादनमा विशेष टेवा पुग्ने उदेश्यले आयोजना गर्न लागिएको गाउँपालिका अध्यक्ष निशान्त शर्माले बताउनुभयो ।
महेश्वर माध्यमिक विद्यालयको खेलमैदानमा हुने प्रतियोगितामा प्रथम, द्धितिय, तृतिय र सान्त्वनालाई क्रमश ः २ लाख २२ हजार २ सय २२ रुपैयाँ, १ लाख ५५ हजार ५ सय ५५ रुपैयाँ, १ लाख ११ हजार १ सय ११ रुपैयाँ र ५५ हजार ५ सय ५५ रुपैयाँको साथमा ट्रफि, मेडल र प्रमाणपत्र प्रदान गरिने भएको छ ।
यस्तै सर्बोत्कृष्ट खेलाडीलाई ११ हजार १ सय ११ रुपैयाँ र अनुशासित खेलाडीलाई ५ हजार ५ सय ५५ रुपैयाँ प्रदान गरिने चिशंखुगढी गाउँपालिकाका निमित्त प्रमुख प्रशासकिय अधिकृत मकर बहादुर राईले जानकारी दिनुभएको छ । खेलाडीहरुले बैशाख १५ गते सम्म टिम दर्ता गर्नु पर्ने छ भने टिम दर्ता शुल्क ५ हजार रुपैयाँ लाग्ने भएको छ ।
Discussion about this post