सिंहकाली आविमा वातावरण संरक्षण सम्बन्धी अन्तरक्रिया

जेठ १२, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ११ तिङ्ला स्थित सिंहकाली आधारभूत विद्यालयमा वातावरण संरक्षण सम्बन्धी विद्यार्थीसँग अन्तरक्रिया गरिएको छ । आज शनिबार तल्लो सोलु जलविद्युत आयोजनाद्धारा विद्यार्थीसँग वातावरण संरक्षण सम्बन्धी अन्तरक्रिया गरिएको सिंहकाली आधारभूत विद्यालयका विद्यालय व्यवस्थापन समितिका अध्यक्ष मौजन राईले जानकारी दिनुभयो ।

“प्रकृतिसँग हाम्रो प्रगाढ सम्बन्ध, रही रहोस्” भन्ने नाराका साथ अन्तरक्रिया कार्यक्रम सहित धुपिको विरुवा रोपिएको उहाँको भनाई छ । विश्वमा जलवायु परिवर्तनले पर्यावरणमा पारेको प्रभाव र वृक्षरोपणले पर्यावरणलाई सन्तुलनमा राख्न कसरी सघाउ पुर्याउँछ भन्ने विषयमा महत्त्वपूर्ण अन्तरक्रिया भएको छ । उक्त कार्यक्रममा कक्षा ६ देखि ८ सम्मका विद्यार्थीहरुको उत्साहजनक सहभागीता रहेको थियो ।