‘आईपीभी’ खोप अभियान आजदेखि, ढुक्क भएर लगाउन स्वास्थ्य कार्यालय सोलुको आग्रह

जेठ १३, सोेलुखुम्बु । सरकारले आजदेखि पोलियो रोगविरुद्धको ’आईपीभी’ खोप अभियान सञ्चालन गर्दैछ । आजदेखि जेठ २६ गतेसम्म दुई हप्ता चल्ने अभियानको सम्पूर्ण तयारी पूरा भएको स्वास्थ्य सेवा विभागले जनाएको छ ।आईपीभी खोप नेपालमा २०७१ असोज महिनादेखि शुरु भएको थियो ।

तर २०७३ वैशाखदेखि २०७५ असोजसम्म जन्मिएका बालबालिका यो खोप लगाउन छुटेका थिए । अभियानमार्फत छुटेका ती बालबालिकालाई आईपीभी खोप दिन लागिएको हो । नेपाल सरकारले घोषणा गरेको राष्ट्रिय आइभिपि खोप अभियान अन्तर्गत सोलुखुम्बुका २ सय ९८ खोप केन्द्रबाट यो खोप दिइने भएको छ । जहाँ ४ हजार ८ सय ८८ जना बालबालिका रहेको स्वास्थ्य कार्यालय सोलुखुम्बुका प्रमुख सुमन तिवारीले जानकारी दिनुभयो ।

सरकारले दिने अनि निःशुल्क पाइने आईपीभी खोपबाट सामान्य दुखाइ, सुई लगाएको ठाउँमा सुन्निने वा हल्का ज्वरो आउनेबाहेक बालबालिकामा अरू कुनै असर नगर्ने प्रमुख तिवारीको भनाई छ । यो खोप सुरक्षित भएकाले ढुक्क भएर आफ्ना बालबालिकालाई लगाउन उहाँको सल्लाह छ ।