थुलुङ दुधकोशी गाउँपालिका : प्रधानमन्त्री रोजगार कार्यक्रम’ मार्फत् ७५ जनाले पाए रोजगारी

जेठ १३, सोलुखुम्बु । थुलुङदुधकोशी गाउँपालिकामा प्रधानमन्त्री रोजगार कार्यक्रम मार्फत ७५ जना स्थानीयले रोजगारी पाएका छन् । सरकारले बेरोजगारहरूलाई लक्षित गरी सुरु गरेको प्रधानमन्त्री रोजगार कार्यक्रमलाई स्थानीय तहले प्राथमिकताका साथ सञ्चालन गरेको स्थानीय तहको रोजगार शाखाले जनाएको छ ।

बेरोजगारहरूलाई गाउँमै रोजगारी दिने उद्देश्य अनुसार सुरु भएको प्रधानमन्त्री रोजगार कार्यक्रममा बाटो तथा सडक निर्माण गरिदै आइएको छ । प्रधानमन्त्री रोजगार कार्यक्रम अन्तर्गत गाउँपालिकाभित्र ९ वटा योजना छनौट भएको छ । सो योजनाका लागि ७५ जनाले १०० दिनका लागि रोजगारी पाएका छन् ।

प्रधानमन्त्री रोजगार कार्यक्रममा संलग्न युवाहरूले दैनिक ८ सयका दरले ज्याला पाउने थुलुङ गाउँपालिकाका रोजगार सहायक राजेन्द्र कुमार बस्नेतले जानकारी दिनुभयो । नेपालको संविधानको मौलिक हक र कर्तव्य अन्तर्गत धारा ३३ मा रहेको रोजगारीको हकलाई कार्यान्वयन गर्न नेपाल सरकारले रोजगारीको हक सम्बन्धी ऐन, २०७५ जारी गरेको छ ।

ऐनको दफा ८ को उपदफा (१) मा नेपाल सरकार, प्रदेश सरकार तथा स्थानीय तहले आवश्यक रोजगार कार्यक्रम सञ्चालन गर्न सक्ने प्रावधान रहेको र उपदफा (३) ले कार्यक्रम सञ्चालन सम्बन्धी अन्य व्यवस्था तोकिए बमोजिम हुने व्यवस्था रहेको छ ।