अभिभावक र विद्यार्थीहरुको विश्वास र भरोसा सामुदायिक विद्यालय बन्नुपर्छ : अध्यक्ष राई

चैत्र ३०, सोलुखुम्बु । सोलुखुम्बुको थुलुङ दुधकोशी गाउँपालिका अध्यक्ष असिम राईलेअभिभावक र विद्यार्थीहरुको विश्वास र भरोसा सामुदायिक विद्यालय बन्नु पर्ने बताउनुभएको छ । आज कालिका देवी माध्यमिक बिद्यालयको पूर्व विद्यार्थी भेटघाट, शुभकामना आदान प्रदान तथा पूर्व विद्यार्थी समाजको तदर्थ समिति गठन कार्यक्रमा यस्तो बताउनुभयो ।

यदि गाउँलाई विगठन हुनबाट जोगाउने हो भने सामुदायिक विद्यालयमा हुने शिक्षण सिकाइ उपलब्धिमा गुणात्मक फड्को मार्नुको विकल्प नरहेको अध्यक्ष राईको भनाई छ । उहाँले भन्नुभयो “सामुदायिक विद्यालयलाई विगत केहि दशक यता हामी सबैले शिथिल बनाएका छौं । यहीँ सन्दर्भमा थुलुङ दुधकोसी स्थानीय सरकारले अनेकन प्रयासहरु गर्दै आएको कुरा यहाँहरूलाई अवगत छ ।”

तदर्थ समिति गठन भएसँगै उक्त समिति विद्यालयको शैक्षिक उन्नयनको लागि कोषेढुङ्गा साबित हुने विश्वास व्यक्त गर्नुभएको छ । गुणस्तरिय शिक्षा हासिल गर्ने विद्यार्थीहरुको नैसर्गिक अधिकार पुरा हुने साथै स्थानिय सरकारको सोचलाई पुरा गर्न महत्वपुर्ण कार्यक्रम आयोजना गरि अनवरत खट्नुहुने सरोकारवाला प्रति धन्यवाद व्यक्त गर्नुभएको छ ।