ओखलढुंगामा टिपर दुर्घटना हुँदा दुई जना घाईते

चैत्र ३१, सोलुखुम्बु । सिद्धिचरण लोकमार्ग अन्तर्गत ओखलढुंगाको मानेभञ्ज्याङ गाउँपालिका ६ हिलेपानीमा गए राति टिपर दुर्घटना भएको छ। दुर्घटनामा टिपर चालक र सहचालक घाइते भएका छन्। मिर्चैयाबाट सिमेन्ट लोड गरी सोलुखुम्बुतर्फ जाँदै गरेको ना ७ ख ५९८४ नम्बरको टिपर अनियन्त्रित भई सडकबाट अन्दाजी २० मिटर तल खसेको प्रहरीले जनाएको छ।

दुर्घटनामा टिपर चालक उदयपुर कटारी नगरपालिका ४ बस्ने २३ वर्षीय अम्बर राउतको टाउकोमा चोट लागेको छ । यस्तै सहचालक सोही ठाउँका १९ वर्षीय आशिस पुलामी मगरको टाउको, कम्मर र शरीरका विभिन्न भागमा चोट लागेको छ। दुवै घाइतेलाई उपचारका लागि जनसेवा पोलिक्लिनिक घुर्मी उदयपुर पठाइएको र दुवैको अवस्था मध्यम रहेको प्रहरीले जनाएको छ।

टिपर घटनास्थलमै रहेको र सडक अवरोध नभएको प्रहरीले जानकारी दिएको छ। घटनास्थल हर्कपुर प्रहरी चौकीबाट अन्दाजी ५ किलोमिटर पूर्व(उत्तरमा पर्दछ। दुर्घटनाको कारण भने खुल्न सकेको छैन र प्रहरीले थप अनुसन्धान गरिरहेको छ।