सिन्धुलीको दुधौलीमा बेवारिसे शव फेला

बैशाख १, सोलुखुम्बु । सिन्धुलीमा बेवारिसे शब फेला परेको छ । मदनभण्डारी राजामार्ग अन्र्तगत सिन्धुलीको दुधौली नगरपालिका ५ सिथौँलीमा बेवारिसे पुरुषको शव फेला परेको हो । आइतबार बिहान करिब ७ बजे स्थानीयले बेवारिस पुरुषको शब घोप्टो परिरहेको अवस्थामा देखेपछि तत्काल प्रहरीलाई जानकारी गराएका थिए ।

घटनाबारे जानकारी आएपछि तत्काल जिल्ला प्रहरी कार्यालय सिन्धुलीबाट प्रहरी नायब निरिक्षक सुनिल राइको कमाण्डमा प्रहरी टोलि घटनास्थलमा पुगेको थियो । जिल्ला प्रहरी कार्यालय सिन्धुलीको अनुसार शव करिब ६० वर्षका पुरुष रहेको अनुमान गरिएको छ । शिरमा ढाकाटोपी, इष्टकोट, सेतो सर्ट, खैरो खरानी रंगको ट्राउजर लगाएको ५ फिट ४ इन्चि उचाइ भएको पुरुषको शव फेला परेको प्रहरीले जानकारी दिएको छ । निलो रंगको चप्पल लगाएको र कालो पछाडि भिर्ने झोला भित्र लताकपडा समेत रहेको रहेको छ । शव फेला परेको स्थान वरपरको क्षेत्रमा प्रहरी टोली खटाई अनुसन्धान सुरु गरिएको छ ।

प्रारम्भिक अनुमानमा मृत्युको कारण स्पष्ट हुन सकेको छैन । आत्महत्या वा हत्या भन्ने निष्कर्षमा नपुगेको प्रहरीले बताएको छ । पोस्टमार्टम रिपोर्ट आएपछि थप विवरण स्पष्ट हुने प्रहरीले जनाएको छ । पोस्टमार्टमको लागि सिथौँली अस्पताल दुधौलीको शब गृहमा राखिएको छ । प्रहरीले हालसम्म कोही पनि व्यक्ति हराएको भनेर दर्ता भएको निवेदनसँग शवको विवरण मिल्दो–जुल्दो नदेखिएको बताएको छ । त्यसैले प्रहरीले सार्वजनिक अपिल जारी गर्दै मृतकबारे कुनै जानकारी भएमा नजिकको प्रहरी कार्यालयमा सम्पर्क गर्न अनुरोध गरेको छ ।