पहिरो पिडितलाई सोलुदुधकुण्ड नगरपालिकाले गर्याे आर्थिक सहयोग

बैशाख ५, सोलुखुम्बु । सोलुखुम्बुको सोलुदुधकुण्ड नगरपालिकाले गत असोज १०, ११ र १२ गते अविरल बर्षासहितको पहिरोले घरमा क्षति पुर्याएका पिडित परिवारलाई आर्थिक सहयोग गरेको छ । गोराखानी र टाप्टिङका पिडित परिवारलाई पुन घर निमार्णका लागि शुक्रबार २ लाख ५० हजार रुपैयाँका दरले आर्थिक सहयोग हस्तान्तरण गरिएको नगर प्रवक्ता फुर्वा ग्याल्जेन शेर्पाले जानकारी दिनुभयो ।

नगरपालिकाले वडा नम्बर ९ र १० का ३ घर परिवारलाई २ लाख ५० हजारका दरले र सोलुदुधकुण्ड नगरपालिका वडा नम्बर २ बेनीका ४ घर बाढी पीडितलाई घर पुनःनिर्माण लागि प्रतिघर एक लाख रुपैयाँको दरले चेक हस्तान्तरण गरिएको सोलुदुधकुण्ड नगरपालिकाका मेयर नाम्गेल जाङ्बु शेर्पाले बताउनुभयो । उहाँका अनुसार पहिरोमा परेर ज्यान गुमाएका वडा नम्बर ९ र १० का परिवारलाई सोही समयमा नै ५० हजारका दरले आर्थिक सहयोग गरिएको थियो ।