ताप्लीमा लाखे नाच तथा बाजा प्रशिक्षण

बैशाख ५, सोलखुुम्बु । उदयपुरको ताप्ली गाउँपालिकामा लाखे नाच तथा बाजा सम्बन्धि तालिम सुरु भएको छ । नेवारी समूदायको परम्परागत भाषा, संस्कार र संस्कृति जगेर्णा गर्ने उद्देश्यले बिहिबारबाट उक्त तालिम सुरु गरिएको हो । नेवा देयः दः बु केराबारिको आयोजना, ताप्ली गाउँपालिका र झिगु नेवाः पुचः(हाम्रो नेवार समूह)को सहकार्यमा बैशाख ४ गते देखि १८ गतेसम्म तालिम संचालन गरिने भएको आयोजकले जनाएको छ ।

तालिमको सहजीकरण झिगु नेवाःपुचः, त्रियुगा नगरपालिका गाईघाटका लाखे प्रशिक्षक दिपक श्रेष्ठले गरिरहनु भएको सहकर्मी ठबिन्द्र मगरले जानकारी दिनुभयो । यो तालिम पश्चात परिकार, संस्कार र संस्कृति साथै भाषाको तालिम प्रदान गरिने नियम रहेको नेवा देयः दः बु जिल्ला कार्य समिती उदयपुका सचिव गोपाल श्रेष्ठले बताउनुभयो । साथै ताप्ली –५, केरावारिमा निर्माण हुँदै गरेको भिमसेन मन्दिरको लागि आवश्यक गजुर पनि जिल्ला कार्यसमितिको तर्फबाट निशुल्क सहयोग गर्ने प्रतिवद्धता समेत व्यक्त गर्नुभयो । उद्घाटन सत्रमा बोल्दै वडाध्यक्ष बिष्णु कुमार श्रेष्ठले वडा नम्बर ५ को वडाध्यक्ष पदमा आएदेखी नै वडा भित्रका विभिन्न जातिय संस्कार र संस्कृति जगेर्नाका लागि प्रत्येक वर्ष बजेट बिनियोजन गर्दै आईरहेको बताउनुभयो ।

यस्तै नेवारी समाजको लागि सभा भवन निर्माण र भिमसेन मन्दिर निर्माणका लागि निरन्तर बजेट बिनियोजन गरिरहेको र आगामी दिनमा पनि सहयोग गरिरहने प्रतिवद्धता व्यक्त गर्नु भएको छ । १५ दिनसम्म सन्चालन हुने प्रशिक्षण कार्यक्रममा ताप्ली ५ रुपाटारका ४५ जना नेवार समूदायका महिला पुरुषले सकृय सहभागिता रहेको आयोजकले बताएको छ । लाखे नाच तथा बाजा प्रशिक्षण कार्यक्रमको अन्तिम दिन नेवा देयः द बु संस्था ताप्ली ५ केरावारिको भवन नजिकै निर्माण भएको भिमसेन मन्दिरको उद्घाटन समेत गरिने संस्थाका अध्यक्ष इन्द्र नारायण श्रेष्ठले जानकारी दिनुभएको छ ।

उक्त प्रशिक्षण कार्यक्रमको उद्घाटनमा प्रमुख अतिथी ताप्की ५, रुपाटारका वडाध्यक्ष बिष्णु कुमार श्रेष्ठ, बिशेष अतिथी ताप्ली नेवा देयः द बु का पालिका स्तरिय अध्यक्ष चन्द्रामाया श्रेष्ठ, जिल्ला सचिब, गोपाल श्रेष्ठ, कोषाध्यक्ष कुलचन्द्र श्रेष्ठ लाखे प्रशिक्षक दिपक श्रेष्ठ लगायत अन्य राजनीतिक दलका प्रतिनिधि, बुद्धिजीवी, नेवार समूदायका पदाधिकारीहरुको समेत उपस्थिती रहेको थियो ।