अनुवाशिंक स्रोत केन्द्र स्याङ्बुचेले ५२ औँ स्थापना दिवस मनाउदै

बैशाख ६, सोलुखुम्बु । हिमाली जिल्ला सोलुखुम्बुमा रहेको अनुवाशिंक स्रोत केन्द्र स्याङ्बुचेले ५२ औँ स्थापना दिवस मनाउने भएको छ । वि.सं. २०३० साल बैशाख ७ गते चौरी फार्मको नामले स्थापना भएको कार्यालयले  वैशाख ७ गते अर्थात भोली ५२ औँ स्थापना दिवस मनाउने भएको हो । गत असोज २ गते नेपाल सरकार मन्त्री परिषद्को निर्णय अनुसार बैशाख ७ गतेलाई प्रथम राष्ट्रिय याक दिवस घोषणा गरेकाले उक्त कार्यक्रम समेत गरिने अनुवाशिंक स्रोत केन्द्र स्याङ्बुचेका सुचना अधिकारी ललन यादवले जानकारी दिनुभयो ।

उहाँका अनुसार खुम्बु क्षेत्रमा करिब १०० को हाराहारीमा याक पाल्ने किसान रहेका छन् । उनीहरुले ९ सय ९६ वटा याक, ५ सय ८२ वटा नाक र १ सय ४६ वटा चौरी व्यवसाय गरिरहेको जनाईएको छ । आईतबार हुन लागेको कार्यक्रमको प्रधानमन्त्री केपी शर्मा ओलीले काठमाण्डौंमा सम्बोधन गर्ने र खुम्बु पासाङल्हामु गाउँपालिका ४ स्याङ्बुचेमा स्थानीय, याक पाल्ने कृषकहरुसँग मिलेर प्रथम याक दिवसलाई मनाइने अनुवाशिंक स्रोत केन्द्र स्याङ्बुचेका प्रमुख डा. रुविना मर्हजनले बताउनुभयो ।

हिमाली क्षेत्रको गहनाको रुपमा रहेको याकचौरी जोगाउन प्रभावकारी नीति, कार्यक्रम र योजना ल्याउन सरकारले ढिला गर्न नहुने उहाँको भनाई छ । याकचौरी कृषिसँगै पर्यटन प्रवद्र्धन, जैविक विविधता र पर्यावरण संरक्षणका दृष्टिले पनि महत्वपूर्ण भएकोले यसमा सरकारको विशेष ध्यान पुग्नुपर्ने उहाँले उल्लेख गर्नुभयो ।

हाल सोलुखुम्बु, डोल्पा, हुम्ला, मुस्ताङ, मनाङ, दोलखा, ताप्लेजुङ, रसुवा, गोरखा, संखुवासभा, मुगु, सिन्धुपाल्चोक, रामेछाप, पाँचथर, भोजपुर, जुम्ला, म्याग्दी, दार्चुला, ओखलढुंगा, कास्की, बझाङ, खोटाङ, धादिङ, कालिकोट, बाजुरा, इलाम, लमजुङ, नुवाकोट र रुकुम जिल्लामा कृषकहरु याकचौरी व्यवसायमा संलग्न छन् ।