अपाङ्गता भएका लिखु पिकेका बस्नेतलाई नागरिकता प्राप्त, अब सरकारी भत्ता पाउने

बैशाख ७, सोलुखुम्बु । सोलुखुम्बुको लिखुपिके गाउँपालिका वडा नम्बर ४ का राम कुमार बस्नेतले आईतबार नागरिकताको प्रमाणपत्र पाएका छन् । अपाङ्गता भएका ४१ बर्षीय बस्तेतलाई जिल्ला प्रशासन कार्यालय सोलुखुम्बुले नागरिकता बनाइदिएको हो । प्रमुख जिल्ला अधिकारी अनोज कुमार घिमिरे र वडा अध्यक्षको बिषेश पहलमा उनलाई नागरिकता प्रदान गरिएको छ ।

एक ठाउँबाट अर्को ठाउँमा सहायता लिनु पर्ने अवस्थामा उनको नागरिकता बुवा–आमा नहुँदा सनाखत गर्न नसकेर बन्न सकेको थिएन । विसं २०४० सालमा जन्मिएका बस्नेत ४ बर्षको हुँदा देखि दुवै आँखा गुमेको उनका काका रगं बहादुर बस्नेतले बताउनुभयो । आज काकाकै सनाखसतमा नागरिकता प्रदान गरिएको छ ।

प्रमुख जिल्ला अधिकारी घिमिरेले कतिपय अति अशक्त अपाङ्गता भएकालाई परिवारले नागरिकता बनाउन प्रशासनमा ल्याउन नसक्दा ती नागरिक नागरिकताविहीन हुने र उनीहरूले सामाजिक सुरक्षा भत्ता पाउनबाट वञ्चित हुनुपर्ने अवस्था आउने हुँदा एक सकरात्मक सोच र ईच्छा शक्तिका साथ नागरिकता प्रदान गरिएको बताउनुभयो । अपाङ्गता भएका नागरिकले सहज रुपमा नागरिकता प्राप्त गर्दा राज्यबाट पाउने सेवा सुविधाबाट वञ्चित हुनु नपर्ने बताउनुभयो ।

यस्तै उहाँले आफु सोलुखुम्बुमा प्रमुख जिल्ला अधिकारीको रुपमा आएदेखि करिब ५ जना प्रजिअले वितरण गर्न नसकेको नागरिकता प्रदान गरेको दाबी गर्नुभएको छ ।