सोलुखुम्बुको पन्चनमा उच्च गतिको विद्युत् प्रवाह हुँदा लाखौँको क्षति, स्थानीय आक्रोशित

बैशाख ७, सोलुखुम्बु । सोलुखुम्बुको थुलुङ दुधकोशी गाउँपालिका ३ पन्चनमा उच्च गतिको विद्युत् प्रवाह हुँदा लाखौँको क्षति भएको छ । गत चैत्र ३० गते साँझ ६ : ३० बजेको समयमा नेपाल विद्युुत प्राधिकरण शाखा सोलुखुम्बु वितरण केन्द्रले २३० भोल्टेजको विद्युत् प्रवाह गर्नु पर्नेमा करिब ५०० भोल्टेजको विद्युत प्रवाह गर्दा ८ लाख बढीको क्षति भएको हो ।

उपकरणमा क्षति पुर्याएको समयमा हावाहुरी, बर्षा र चट्याङ नपरेको सो समय मौसममा कुनै खराबी नदेखिएको स्थानीयहरुले बताएका छन् । उच्च गतिको विद्युत् प्रवाह हुँदा साविक पंचन गाविसको ३,५,६,७,८ र ९ लगायतका उपभोक्ताहरुको टिभि, बल्भ, वाईफाई, मोबाईल, चार्जर लागयत विद्युतिय उपकरणहरु पूर्ण रुपमा क्षति पुगेको स्थानीयबासी भेषराज निरौला (उद्धव) ले जानकारी दिनुभयो ।

उहाँका अनुसार हाल नेपाल प्रहरी काँगेल चौकीको उपस्थितीमा सम्पूर्ण विवरण संकलन गरी एक एक प्रति प्रहरी, वडा कार्यालयलाई बुझाईएको छ । यस्तै स्थानीयबासीहरुले आज (आईतबार) उपभोक्ताहरुको क्षतिपूर्ति तथा विद्युत प्रशारण लाईनलाई व्यवस्थित र दिगो साथै भरपदो बनाउनका लागि पहल गर्न जिल्ला प्रशासन कार्यालयसँग माग गरेका छन् ।

यस्तै प्रमुख जिल्ला अधिकारी अनोज कुमार घिमिरेले आवश्यक पहल गर्ने प्रतिबद्धता व्यक्त गर्नुभएको छ, भने नेपाल विद्युुत प्राधिकरण शाखा सोलुखुम्बु वितरण केन्द्रले मौसम खराबीका कारण उपकरणहरुमा क्षति पुगेको बताएको छ । यता पञ्चनबासीहरुले नेपाल विद्युुत प्राधिकरण शाखाको लापारबाहिले नै सम्पूर्ण उपकरणहरु ध्वस्त भएको दाबी गर्दै आईरहेका छन् ।