सङ्घीय निजामती ऐन जारीको माग गर्दै सोलुका तीन कर्मचारी संगठनले बुझाए ज्ञापनपत्र

बैशाख ८, सोलुखुम्बु । सोलुखुम्बुका तीन कर्मचारी सङ्गठनले सङ्घीय निजामती ऐन जारी गर्न माग गर्दै जिल्ला प्रशासनमार्फत सभामुखलाई ज्ञापनपत्र बुझाएका छन् । सोमबार संयुक्त रूपमा जिल्ला प्रशासन कार्यालयमा पुगेर कर्मचारी सङ्गठनहरूले सभामुखलाई पठाउने गरी प्रमुख जिल्ला अधिकारी अनोज कुमार घिमिरेलाई ज्ञापनपत्र हस्तान्त्रण गरेका हुन् ।

नेपाल राष्ट्रिय निजामती कर्मचारी संगठन, नेपाल निजामती कर्मचारी युनियन र नेपाल निजामती कर्मचारी संगठनले सयुंक्त ज्ञापन पत्र बुझाएको नेपाल निजामती कर्मचारी युनियन जिल्ला कार्य समिति सोलुखुम्बुका अध्यक्ष केशव ढुंगानाले जानकारी दिनुभयो । ज्ञापन प्रत्रमा निजामति कर्मचारी भन्नाले संघ, प्रदेश र स्थानीय तहमा कार्यरत सबै कर्मचारीलाई सम्झनु पर्छ भन्ने बिषय परिभाषा समेट्नु पर्ने, संघ प्रदेश र स्थानीय तहको अन्तरसम्बन्ध कायम हुने गरी पेसागत हकहित र अधिकारका लागि संगठित हुन कार्यालय प्रमुख हुने वाहेक शाखा अधिकृत वा आठौँ तहसम्मका कर्मचारीहरु सदस्य हुन पाँउने गरी सामुहिक सौदाबाजी सहितको राष्ट्रिय स्तरका ट्रेड युनियन र आधिकारिक ट्रेड युनियनको व्यवस्था हुनुपर्ने माग राखिएको छ ।

यस्तै निजामती सरुवा प्रणालीलाई व्यवस्थित गर्न चक्रिय र पूर्वानुमान योग्य बनाउदै बनाउनुपर्ने, अस्थायी करारमा काम गरेका कर्मचारीलाई एकपटक उमेरको हद नलाग्ने गरी समिती प्रतियोगिताबाट स्थायी गर्ने र हुन नसक्ने कर्मचारीलाई स्थायी सरहको उपदान दिएर अवकाश दिने व्यवस्था हुनुपर्ने लगायत विभिन्न ११ वटा बुँदाहरुमा समावेश गरिएको मागहरु सरकारले यथाशिघ्र सम्बोधन गर्नुपर्ने विज्ञप्तिमा उल्लेख गरिएको छ । कर्मचारी सङ्गठनहरूले यसअघि भएका सहमति, सम्झौता र अदालतले दिएको आदेशलाईसमेत समेटेर तत्काल सङ्घीय निजामती ऐन जारी गर्न माग गरेका छन् । देशभरि वैशाख ८ गते ज्ञापनपत्र बुझाउने कर्मचारी सङ्गठनहरूको संयुक्त कार्यक्रम रहेको थियो । माग पुरा नभए वैशाख १० गते बुधबार आन्दोलन परिचालन समिति घोषणा गर्ने र १२ गते शुक्रबार संसद सचिवालय अगाडि भेला आयोजना गर्ने कर्मचारी सङ्गठनहरुको केन्द्रीय कार्यक्रम छ ।