४४ प्रतिशतले घट्यो सगरमाथामा हुने आरोहण जन्य दुर्घटनाको दर 

जेठ १४, सोलुखुम्बु । सगरमाथा आरोहणका क्रममा मृत्यु र बेपत्ता हुने दर यस वर्ष ४४ प्रतिशतले घटेको छ ।  अघिल्लो वर्षको तुलनामा यो वर्ष आरोहण जन्य दुर्घटनाबाट मृत्यु हुने र बेपत्ता हुने दर ४४ दशमलव ४४ प्रतिशतले घटेको पर्यटन विभागले जनाएको छ ।  यस अघिको सिजनमा सगरमाथा आरोहणका क्रममा मृत्यु हुने र बेपत्ता हुनेको संख्या १८ जना थिए भने यस सिजनमा ८ जना रहेको नापी विभागका उपसचिव एबम हाल पर्यटन विभागको सगरमाथा आधारशिविर स्थित अस्थायी फिल्ड कार्यालय प्रमुख खिमलाल गौतमले बताउनुभयो ।

यो सिजनमा सगरमाथा आरोहणका क्रममा २ जना शेर्पा र १ जना बेलायती नागरिक बेपत्ता छन । फिल्ड कार्यालयका अनुसार १ नेपाली सहित ४ जना विदेशीको आरोहण जन्य दुर्घटनाबाट मृत्यु भइसकेको छ ।  यस वर्ष मृत्यु हनेमा मंगोलियन नागरिक द्धय ५३ वर्षीय उसुख्र्गल तेसीदेनडेम्बा, ३३ वर्षीय पियोरभिसुरेन लखाग भाजव, रोमानियाका ४६ वर्षीय गाब्रियल भियोरेल तवारा, जोसह्वा चेरुयियट किरुइ र नेपाली ३७ वर्षीय विनोद बाबु बस्ताकोटी को मृत्यु भएको छ ।

बेपत्ता हुनेमा सोलुखुम्बुको लिखुपिके गाउँपालिकाका ४४ वर्षीय ङवाङ शेर्पा, मकालु गाउँपालिका सङ्खुवासभाका २३ वर्षीय पास तेन्जी शेर्पा बेलायती नागरिक ४० वर्षीय डेनियल पउल पेटरसन रहेका छन ।  बेपत्ताहरूको खोजीकार्य भइरहेको पनि जनाइएको छ । यस्तै यो सिजनको सगरमाथा आरोहण करिव अन्तिम चरणमा पुगेको छ ।

प्रमुख गौतमका अनुसार यस सिजनमा सगरमाथा आरोहणका लागी अनुमति लिएका ४ सय २० आरोही तथा उनीहरूका गाइड सहित ६ सय जना आरोहणका लागी गएकोमा अव करिव १५ जनामात्र बाँकी रहेको उहाँको भनाई छ ।