संखुवासभामा भीरबाट लडेर ८ वर्षे बालकको मृत्यु

बैशाख ११, सोलुखुम्बु । संखुवासभाको चैनपुर नगरपालिका –९ त्रिशुलेमा भीरबाट लडेर एकजना बालकको मृत्यु भएको छ । भीरबाट लडेर चैनपुर–९ त्रिशुलेस्थित सिंह देवीथान जंगलमा बाख्रा चराउन गएका दिलबहादुर भण्डारीका ८ वर्षीय छोरा दिलीप भण्डारीको मृत्यु भएको जिल्ला प्रहरी कार्यालय संखुवासभाका प्रहरी निरीक्षक अभिषेक श्रेष्ठले जानकारी दिनुभयो । बिहीबार दिउँसो साढे २ बजे बाख्रा चराउन गएका बालकको भीरबाट लडेर मृत्यु भएको हो ।

बाख्रा चराउन गएका ८ वर्षीय बालक भण्डारी चैनपुर–९ त्रिशुले भीरबाट करिब १५ मिटर तल खसेर घटनास्थलमै मृत्यु भएको प्रहरीले जनाएको छ । घटनाको खबर पाउनासाथ इलाका प्रहरी कार्यालय चैनपुरका प्रहरी निरीक्षक देउप्रसाद लिम्बुको टोली घटनास्थल पुगेको छ ।

घटनाका बारेमा थप अनुसन्धान भइरहेको जिल्ला प्रहरी कार्यालय संखुवासभाले जनाएको छ । मृतकको शव पोष्टमार्टमका लागि चैनपुर प्राथमिक स्वास्थ्य केन्दमा ल्याइएको जिल्ला प्रहरी कार्यालयले जनाएको छ ।