आन्दोलनरत चिकित्सकहरुको माग सम्बोधन गर्न सोलुका चिकित्सकहरुले गरे जिल्ला प्रशासन मार्फत सरकारको ध्यानाकर्षण

बैशाख ११, सोलुखुम्बु । सोलुखुम्बुका चिकित्सकहरुले प्रमुख जिल्ला अधिकारीमार्फत प्रधानमन्त्रीलाई ज्ञापनपत्र बुझाएका छन् । देशभरका आवासीय चिकित्सकहरूले गरिरहेको आन्दोलनप्रति ऐक्यबद्धता जनाउँदै ज्ञापन पत्र बुझाइएका हुन् । जिल्ला प्रशासन कार्यालय मार्फत प्रधानमन्त्री तथा मन्त्री परिषद्को कार्यालयलाई ज्ञापन पत्र पठाइएको जिल्ला अस्पताल फाप्लुका डा. राम बाबु जोशीले बताउनुभयो ।

उहाँका अनुसार नेपाल चिकित्सक संघको मागहरुलाई सम्बोधन गर्न ज्ञापन पत्र बुझाइएको हो । संघको माग मध्ये पहिलो आवासीय चिकित्सकलाई आठौं तहका चिकित्सक सरहको सेवा, सुविधासहित निर्वाह भत्ता दिने भनी गरिएको निर्णय निजी मेडिकल कलेजमा समेत लागू गर्नुपर्ने रहेको छ । त्यसैगरी दोस्रोमा आवासीय चिकित्सकहरूको कार्यसमय सम्बन्धी स्पष्ट र व्यवहारिक मापदण्ड निर्माण गर्नुपर्ने माग चिकित्सक संघले राखेको छ ।

देशभरका चिकित्सकहरूको भावना सम्बोधन गर्न सरकार गम्भीर हुनुपर्ने तेस्रो माग राखिएको छ । संघले वैशाख ११ गतेसम्म माग सुनुवाइ नभए वैशाख १२ गतेदेखि आकस्मिकबाहेक सम्पूर्ण स्वास्थ्य सेवा ठप्प पार्दै आन्दोलन चर्काउने चेतावनी दिइएको छ ।