सोलुका उद्योगी तथा व्यवसायीलाई कर सम्बन्धी तालिम, ७१ जना लाभान्वित

बैशाख १३, सोलुुखुम्बु । सोलुखुम्बुका उद्योगी तथा व्यवसायीहरुका लागि दुई दिने कर सम्बन्धी तालिमबाट ७१ जना व्यवसायी लाभान्वित भएका छन् । उद्योगी व्यवसायीहरुलाई कर शिक्षा र कानुनी व्यवस्थाका बारेमा जानकारी गराउने उद्देश्यले जिल्लामा बिहिबार र शुक्रबार संचालित तालिमबाट उक्त संख्याका व्यवसायीहरु लाभान्वित भएका हुन् । उद्योग वाणिज्य संघ सोलुखुम्बुको आयोजित तालिममा खरिद बिक्री, भ्याट खरिद, भ्याट बिक्री, प्यान खरिद, प्यान बिक्री, लेदर खाता, खरिद बिक्री खाता, डेट आय कर सम्बन्धिको तालिम लिन पाउँदा सहभागीहरुले खुसी व्यक्त गरेका छन् ।

तालिमको समापनमा सोलुखुम्बु उद्योग वाणिज्य संघका अध्यक्ष रामलाल श्रेष्ठले जिल्लाका सबै व्यवसायीमा करका बारेमा सचेतना जगाउने र कानुनी प्रावधानका विषयमा जानकारी गराउने उद्देश्यले तालिम आयोजना गरिएको बताउनुभयो । यस्तै सोलुखुम्बु उद्योग वाणिज्य संघका उपाध्यक्ष एवंम तालिमका प्रशिक्षक भानुभक्त उपाध्यायले उद्योगी व्यवसायहरुलाई करका बारेमा भएका अन्यौलताहरु हटाउन र कर तिर्न प्रति उत्प्रेरित गर्न तालिमले महत्वपूर्ण टेवा पुग्नेमा विश्वास व्यक्त गर्नुभएको छ ।

उहाँले राज्य सञ्चालनको मुख्य आधार कर भएकाले गर्वका साथ व्यवसाय सञ्चालन गर्न समेत उद्योगी व्यवसायीहरुलाई आग्रह गर्नुभयो । उहाँले कर के हो ? करका प्रकार, कानुनी व्यवस्था, संस्था दर्ता गर्दा ध्यान दिनुपर्ने कुराहरु, करका प्रक्रिया, कानुनी अड्चन लगायतका बारेमा जानकारी दिनु भएको छ । तालिममा सोलुखुम्बु उद्योग वाणिज्य संघमा आवद्ध उद्योगी लगायत अन्य व्यवसायीहरुको सहभागीता रहेको थियो ।