शिक्षकहरुको जायज माग पुरा गर्नुपर्ने ऐक्यबद्धता सहित विद्यालयमा पठनपाठन सुरु गर्न सोताङ गाउँपालिकाको परिपत्र

बैशाख १४, सोलुखुम्बु । सोलुखुम्बुको सोताङ गाउँपालिकाले शिक्षकहरुको जायज माग पुरा गर्नुपर्ने ऐक्यबद्धता सहित सामुदायिक विद्यालयलाई सोमबारदेखि पठनपाठन सुरु गर्न निर्देशन दिएको छ । पालिकाले आज आईतबार परिपत्र गर्दै बैशाख २१ गते देखि नियमित पठनपाठन सुरु गर्न पालिकाभित्र रहेका सामुदायिक विद्यालयलाई निर्देशन दिएको हो ।

गत चैत्र २० गतेबाट सुरु भएको शिक्षक आन्दोलनको जायज माग पूरा गर्न पालिकाद्धारा पूर्व प्रकाशित विज्ञप्ति मार्फत नेपाल सरकार समक्ष माग गरेको कुरा सम्पूर्ण शिक्षकहरुलाई जानकारी नै रहेको र जायज माग पूरा गर्नुपर्छ भन्न थप शुभेक्षा राखिएको पालिकाको परिपत्रमा उल्लेख गरिएको छ ।

शैक्षिक सत्रको सुरुवातबाटै शिक्षक आन्दोलनको कारण गाउँपालिका भित्रका सामुदायिक विद्यालयहरुमा हाल सम्म विद्यार्थी भर्ना, पाठ्यपुस्तक वितरण, कक्षा संचालन नहुदा विद्यार्थीहरुमा नकरात्मक मनौवैज्ञानिक असर पुगेको भन्दै बालबालिकाको पढ्न पाउँने हक र उनिहरुको मनोवैज्ञानिक पक्षलाई मध्यनजर गर्दै पठनपाठन सुरु गर्न आग्रह गरिएको सोताङ गाउँपालिकाका अध्यक्ष खिलाराज बस्नेतले बताउनुभयो ।

यस्तै पालिकाद्धारा पूर्व प्रकाशित सूचना अनुसार सोताङ गाउँपालिका भित्रका सम्पूर्ण जनप्रतिनिधि, शिक्षक, कर्मचारी र शैक्षिक क्षेत्रमा गाउँपालिका भित्र काम गर्दै आएका संस्थाका कर्मचारीहरुले पालिका भित्रका कुनै पनि निजी विद्यालयमा पठनपाठन गराएको पाईएमा स्थानीय सरकारले हदैसम्मको कारबाही गरिने समेत परिपत्रमा उल्लेख छ ।