सोलुखुम्बुमा वृक्षारोपण गरि मनाइयो गणतन्त्र दिवस 

जेठ १५, सोलुखुम्बु ।  १७ औँ गणतन्त्र दिवसको दिन आज सोलुखुम्बुमा वृक्षारोपण गरेर मनाइएको छ । डिभिजन वन कार्यालय सोलुखुम्बुको आयोजना एवं  जिल्ला प्रहरी कार्यालय सोलुखुम्बुको संयोजनमा जिल्ला प्रहरी कार्यालय परिसरमा वृक्षारोपण गरि दिवस मनाइएको हो । सरकारले १४, १५ र १६ गते ३ दिन दिवस भव्यताका साथ मनाउने निर्देशन गरेबमोजिम आज दोश्रो दिन वृक्षारोपण गरे दिवस मनाइएको छ ।  

जिल्ला प्रहरी कार्यालय परिसर आयोजित वृक्षारोपण तथा शुभकामना आदानप्रदान कार्यक्रममा जिल्ला समन्वय समिति प्रमुख कृष्ण प्रसाद निरौलाले गणतन्त्रलाई संस्थागत गर्दै जानुपर्ने बताउनुभएको छ ।  वृक्षरोपणका राम्रो कामको सुरुवातको प्रतिकात्मक कदम तर्फ इङ्गीत गर्दै  गणतन्त्रको विकल्प गणतन्त्र नै भएकाले सबैले अनुभूत गर्नेगरी कार्यान्वयन गर्नुपर्नेमा जोड दिनुभएको  छ । यस्तै शुभकामना व्यक्त गर्ने क्रममा जिल्ल प्रशासन कार्यालयका प्रमुख देवी पाण्डे खत्रीले गणतन्त्रको स्थापना पछि जनताको छोरो जनताले नै चुनेर राष्ट्रपति भएको र नागरिकको जनजीवनमा सहजता आएको भन्दै सबै जातजाति र महिलाको समान पहुँच पुगेको बताउनुभयो ।

यस्तै डिभिजन वन कार्यालय सोलुखुम्बुका प्रमुख बद्री प्रसाद शाहले गणतन्त्र दिवसलाई संस्थागत गर्नुपर्ने, व्यवस्थित गर्नुपर्ने बताउनुभएको छ । यस्तै कार्यक्रममा सोलुदुधकुण्ड नगरपालिका वडा नम्बर ६ का वडा अध्यक्ष फुर्वा ग्याल्जेन शेर्पाले गणतन्त्रको उपलब्धीलाई सदुपयोग गर्नुपर्ने भन्दै आफ्नो र नगरपालिकाको तर्फबाट सबैलाई शुभकामना व्यक्त गर्नुभयो । कार्यक्रमको  संयोजन गर्न पाउँदा  प्रहरी कार्यालयका प्रमुख तथा प्रहरी नायब उपरीक्षक द्वारीका प्रसाद घिमिरेले गर्व महसुस गरेको भन्दै सबैलाई शुभकामना व्यक्त गर्नुभएको छ ।

वृक्षारोपण कार्यक्रममा जिल्ला स्थित सरकारी कार्यालयका प्रमुख तथा प्रतिनिधि, दुर्गा बक्स गण सल्लेरी गुल्मका गुल्मपति नवराज बस्नेत, डिभिजन वन कार्यालयका सूचना अधिकारी मनराज राई, रेडियो एभरेष्ट सोलुखुम्बुका प्रबन्ध निर्देशक भानुभक्त निरौला, जिल्ला प्रहरी कार्यालय सोलुखुम्बुका प्रहरी निरीक्षक अनिल मिश्र लगायत अन्य प्रहरी तथा नेपाली अधिकृत तथा जवानहरू लगायतको उपस्थिति रहेको थियो ।