खोटाङमा घरेलु विवादले लियो ज्यान, श्रीमानको हत्या अभियोगमा श्रीमती पक्राउ

बैशाख २८, सोलुखुम्बु । खोटाङको हलेसी तुवाचुङ नगरपालिका–९ स्थित माथिल्लो चचिडिङमा घरेलु विवादका कारण एक पुरुषको ज्यान गएको छ । श्रीमानको हत्या गरेको अभियोगमा उनकी श्रीमती ५३ बर्षिया रेनुका राई लाई प्रहरीले शनिबार बिहान पक्राउ गरेको जिल्ला प्रहरी कार्यालय खोटाङले जनाएको छ ।

प्रहरीका अनुसार, पारिवारिक विवादका क्रममा रेनुकाले कोदालोको पासोले प्रहार गर्दा उनका ५१ बर्षिय श्रीमान पाँचकर्ण राई गम्भीर घाइते भएका थिए । घटनापछि अर्खौले प्रहरी चौकीबाट खटिएको प्रहरी टोलीले रेनुकालाई नियन्त्रणमा लिएको हो ।

घाइते पाँचकर्णलाई तत्काल काठमाडौंस्थित अन्नपूर्ण न्यूरो अस्पतालमा उपचारका लागि लगिएको भए पनि उपचारको क्रममा उनको ज्यान गएको प्रहरीले पुष्टि गरेको छ । प्रहरीले घटनाको विस्तृत अनुसन्धान अघि बढाएको जनाएको छ । प्रारम्भिक अनुमान अनुसार, घरेलु विवादकै कारण घटना भएको बताइएको छ । घटनाको थप विवरण आउन बाँकी छ ।