बैशाख ३१, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ७, गार्मामा रहेको नेपाल पर्वतीय प्रशिक्षण प्रतिष्ठान केन्द्र सम्बन्धमा विगतमा गरिएको निर्णय कार्यान्वयन नहुँदा स्थानीयबासी र सरोकारवालाहरु आक्रोशित भएका छन् । २०७९ साल भदौ २७ गते वडा कार्यसमिति बैठकको निर्णय र सोही मितिमा प्रतिष्ठान पदाधिकारी तथा स्थानीय सरोकारवालाबीच भएका छलफलका निष्कर्ष अझै पनि कार्यान्वयन नभएको स्थानीयहरुको गुनासो छ ।
उक्त छलफलमा अव्यवहारिकरूपमा अधिग्रहण गरिएका जग्गा फिर्ता गर्न, जग्गाको पुनः मूल्याङ्कन गरी मुआब्जा वितरण प्रक्रिया सम्पन्न गर्ने, काठमाडौँमा सञ्चालन भइरहेको कलेजलाई सोलुदुधकुण्ड–७ स्थित केन्द्रबाट सञ्चालन गर्ने, स्थानीय प्रतिनिधिको बोर्डमा समावेश सुनिश्चित गर्ने, र भौतिक प्रगतिका विवरण स्थानीय सरकार र नागरिकलाई जानकारी गराउने लगायतका बुँदाहरूमा सहमति भएको थियो । तर यिनै सहमतिहरू अहिलेसम्म पनि लागू नभएको भन्दै स्थानीय तह र सरोकारवालाहरूले बैशाख ३० गते वडास्तरीय भेलामा उक्त विषयमा गम्भीर ध्यानाकर्षण गराएका छन् । भेलाले जेठ १५ भित्रमा प्रतिष्ठानका प्रतिनिधि स्वयं गार्मामा उपस्थित भई छलफल गर्ने र निर्णय कार्यान्वयन प्रक्रिया अघि बढाउने आग्रह गरेको छ ।
वडा अध्यक्ष सोनाम ग्याल्जेन शेर्पाका अनुसार, सो म्यादसम्म पनि निर्णयहरु कार्यान्वयन नभए स्थानीयबासी, राजनीतिक दल, जग्गादाता र सरोकारवालाहरूको सहभागीमा व्यापक आमभेला गरी आवश्यक कडा कदम चालिने चेतावनी दिइएको छ । स्थानीय सरकार र वडावासीहरुले प्रतिष्ठानसँग विगतका सहमतिहरू पालना गर्दै पारदर्शिता र सहभागितामूलक विकास प्रक्रिया सुनिश्चित गर्न जोड दिएका छन् ।
Discussion about this post