त्रियुगा नगरपालिकाले अवैध संरचना डोजर लगाएर हटायो

जेठ २, सोलुखुम्बु । उदयपुरको त्रियुगा नगरपालिकाले सार्वजनिक जमिन अतिक्रमण गरी बनाइएका अवैध संरचनाहरू हटाउने अभियान अन्तर्गत बिहीबार दर्जनभन्दा बढी घरटहरा डोजर लगाएर भत्काएको छ । त्रियुगा बसपार्कको विस्तार योजनाअन्तर्गत वडा नम्बर ३ स्थित बसपार्क क्षेत्रभित्र रहेका नौ वटा टिनको छाना भएका घरहरू हटाइएको वडा अध्यक्ष तिलकबहादुर कटुवालले जानकारी दिनुभयो ।

जिल्ला अदालत उदयपुरको २०७६ साल जेठ ५ गतेको आदेशअनुसार, नगरपालिकाले कानुनी प्रक्रिया पुरा गर्दै पटक–पटक सूचना जारी गरी घरटहरा निर्माणकर्तालाई संरचना हटाउन आग्रह गरेको थियो । तर, आग्रहको बेवास्ता भएपछि नगरपालिकाले बाध्य भएर डोजर प्रयोग गर्नुपरेको नगरप्रमुख वसन्तकुमार बस्नेतले बताउनुभयो । उहाँका अनुसार सत्यदेवदास चौधरी, बलदेवदास चौधरी, शङ्कर चौधरी, सोनु चौधरी, सञ्जयवती चौधरीलगायतले सार्वजनिक ऐलानी जग्गा अतिक्रमण गरी बनाएका संरचनाहरू हटाइएको हो ।

यी संरचनाहरू त्रियुगा नदी किनारमा रहेकाले आधुनिक बसपार्कको निर्माण कार्यमा अवरोध गरिरहेका थिए । नगरपालिकाले वास्तविक सुकुमवासीलाई विस्थापन गरी वैकल्पिक व्यवस्था गर्ने निर्णय गरेको समेत जनाएको छ । यसैगरी, त्रियुगा नगरपालिका–१३ मा रहेको कोशी प्रदेशकै ठूलो संरचना मदन भण्डारी सभाहल आसपास रहेका तीन वटा अवैध घरहरू पनि भत्काउने तयारी भइरहेको जनाइएको छ ।