सोलुखुम्बुमा पत्रकारिता क्षेत्रको सवलीकरणमा स्थानीय तहको भूमिकाबारे अन्तरसंवाद कार्यक्रम सम्पन्न

जेठ ४, सोलुखुम्बु । सोलुखुम्बुमा पत्रकारिता क्षेत्रको सवलीकरणमा स्थानीय तहको भूमिकाबारे अन्तरसंवाद कार्यक्रम सम्पन्न भएको छ । कोशी प्रदेश सरकारको आन्तरिक मामिला तथा कानुन मन्त्रालय र नेपाल पत्रकार महासंघ सोलुखुम्बु शाखाको समन्वय तथा नेपाल पत्रकार महासंघ कोशी प्रदेशको आयोजनामा उक्त कार्यक्रम सम्पन्न भएको हो ।

कार्यक्रममा नेपाल पत्रकार महासंघ कोशी प्रदेश अध्यक्ष भरत खड्काले सम्बोधन गर्दै सोलुखुम्बुका सबै स्थानीय तहहरुले सञ्चार नीति कार्यान्वयनमा ल्याउन आग्रह गर्नुभयो । यस्तै नेपाल पत्रकार महासंघ सोलुखुम्बु शाखाका अध्यक्ष सुवास दर्नालले जिल्लाभित्र सञ्चालित मिडियाहरुको वर्तमान अवस्था र पत्रकारिता सवलिकरणमा स्थानीय तहको भूमिका विषयमा प्रस्तुति दिनुभएको थियो ।

कार्यक्रममा सोलुदुधकुण्ड नगरपालिकाका उपप्रमुख गान्धि माया तामाङ, माप्य दुधकोशी गाउँपालिकाका उपाध्यक्ष गौरव राई, थुलुङदुधकोशी गाउँपालिका वडा नम्बर ७ का वडा अध्यक्ष भोजराज कार्की र प्रमुख प्रशासकीय अधिकृत टुक्ति शेर्पाले स्थानीय तहहरु मिडियाप्रति सकारात्मक भूमिका निभाउँदै आएको बताएका थिए ।

साथै वक्ताहरुले सत्य र तथ्यमा आधारित पत्रकारिता गर्नुपर्नेमा जोड दिँदै पत्रकार महासंघ तथा जिल्लामा सक्रिय पत्रकारहरुलाई त्यसअनुसार काम गर्न आग्रह गरेका छन् । कार्यक्रमले पत्रकारिता क्षेत्रलाई थप सशक्त बनाउन स्थानीय तह र पत्रकारबीच समन्वय र सहकार्यको आवश्यकता औंल्याएको छ ।