सोलुदुधकुण्डमा सुरक्षित आप्रवासन सम्बन्धी पत्रकारहरुसँग अन्तरक्रिया

जेठ ४ सोलुखुम्बु । सोलुखुम्बुको सोलुदुधकुण्ड नगरपालिकाले सुरक्षित आप्रवासन कार्यक्रम अन्तर्गत मिडिया तथा पत्रकारहरुसँग अन्तरक्रिया कार्यक्रम सम्पन्न गरेको छ । “स्वदेशमा नै रोजगारी गरौं, वैदेशिक रोजगारीमा जाने नै भए, सही सूचना लिएर र सीप सिकेर जाऔं ” भन्ने नारासहित कार्यक्रमको आयोजना गरिएको हो ।

सदरमुकाम सल्लेरीस्थित एक होटलमा सम्पन्न कार्यक्रममा सोलुदुधकुण्ड नगरपालिकाकी उपमेयर गान्धि माया तामाङको अध्यक्षता रहेको थियो । कार्यक्रममा सुरक्षित आप्रवासन केन्द्र सोलुखुम्बुले गत साउनदेखि हालसम्म गरेका गतिविधि र उपलब्धिहरूको विवरण प्रस्तुत गरिएको थियो । कार्यक्रममा आप्रवासी श्रोत केन्द्र सोलुखुम्बुबाट साउनमा देखि हाल सम्म ११ सय ४३ जनाले सूचना तथा परामर्श सेवा लिएका छन, भने ३१ लाख ५६ हजार २ सय ३२ रुपैयाँ आर्थिक सहायता प्रदान गरिएको परामर्शदाता सलिना लामिछानेले बताउनुभयो ।

उहाँका अनुसार वैदेशिक रोजगारीका क्रममा जिल्लाका १६ जनाको मृत्यु भएको तथ्याङ्क संकलन गरिएको जानकारी दिनुभएको छ । यस्ता घटनामा परेका अन्य परिवारहरूलाई आवश्यक आर्थिक सहायता प्रदान गर्न पहल भइरहेको पनि उहाँले बताउनुभयो । अन्तरक्रिया कार्यक्रममा जिल्लामा क्रियाशील सञ्चारकर्मीहरूको उल्लेख्य उपस्थिति रहेको थियो । कार्यक्रममा सहभागी पत्रकारहरूले आप्रवासनका विषयमा सही सूचना प्रवाहमा मिडियाको भूमिका महत्वपूर्ण हुने बताएका छन् ।

साथै, आप्रवासन सम्बन्धी सचेतनामूलक सामग्रीहरू थप प्रभावकारी ढंगले सम्प्रेषण गर्न सहकार्यको आवश्यकता औँल्याइएको थियो । सोलुदुधकुण्ड नगरपालिका र सुरक्षित आप्रवासन केन्द्रको सहकार्यमा सञ्चालित यस किसिमको कार्यक्रमले वैदेशिक रोजगारीमा जान चाहने नागरिकहरूलाई आवश्यक जानकारी र मार्गदर्शन प्रदान गर्ने विश्वास आयोजकले व्यक्त गरेका छन् ।