जेठ ३, सोलुखुम्बु । सोलुखुम्बुमा शेर्पा बालबालिका सहायता संघको पहलमा टाक्सिन्दु र रिङमो आविका विद्यार्थीहरूलाई छात्रावृत्ति वितरण गरिएको छ । संघको विशेष पहल र फ्रान्सस्थित लोरेन नेपालको आर्थिक सहयोगमा शनिबार विद्यालयका ३४ जना विद्यार्थीलाई छात्रावृत्ति प्रदान गरिएको हो । संघका संयोजक सन्त बहादुर मगर (र्याबिट) का अनुसार आर्थिक रूपमा कमजोर, असहाय तथा पिछडिएको वर्गका बालबालिकालाई लक्षित गर्दै छात्रावृत्ति वितरण अभियान संचालन गरिएको हो ।
यस अभियान बैशाख ३० गतेदेखि सुरु गरिएको थियो, जसअन्तर्गत विभिन्न विद्यालयका विद्यार्थीहरूलाई चरणबद्ध रूपमा छात्रावृत्ति प्रदान गरिँदै आइरहेको छ । संघका अध्यक्ष निमा शेर्पाले छात्रवृत्तिबाट विद्यार्थीहरूको शैक्षिक पहुँच विस्तार हुने विश्वास व्यक्त गर्दै आगामी दिनहरूमा कार्यक्रमलाई थप व्यापक बनाउँदै लैजाने प्रतिबद्धता जनाउनुभयो । यसअघि नमो बुद्ध आविका ३१ जना, सेतिदेवी आविका ५७ जना, तामाखानी आविका २१ जना, बेनी आविका २७ जना, जुनबेशी माविका २५ जना, बुद्ध एकेडेमी आविका ३८ जना विद्यार्थीलाई छछात्रावृत्ति वितरण गरिसकिएको छ ।
संघले आगामी दिनहरूमा रामपुर र सुन्दर झरना आवि (जेठ ५), जीवन ज्योति मावि र सगरमाथा मावि (जेठ ६) तथा लुरा, फाप्लु, सल्लेरी लगायतका क्षेत्रका विद्यार्थीलाई फाप्लुस्थित नुम्बुर होटलमा (जेठ ७) छात्रावृत्ति वितरण गर्ने कार्यक्रम तय गरेको छ । उक्त अभियानमार्फत करिब ६ सय विद्यार्थीलाई छात्रावृत्ति वितरण गर्ने लक्ष्य राखिएको संघले जनाएको छ । यस कार्यक्रमले दुर्गम हिमाली क्षेत्रमा शिक्षा पहुँचका लागि उल्लेखनीय योगदान पुर्याउने अपेक्षा गरिएको छ ।
Discussion about this post