आधारभूत विद्यालय मादलेको स्वर्ण जयन्ती सुरु, विविध कार्यक्रमको आयोजना

जेठ ४, सोलुखुम्बु । आधारभूत विद्यालय ताप्ली–५, मादलेले आफ्नो स्थापना भएको ५० औं वर्ष पार गरेको उपलक्ष्यमा भव्य रूपमा स्वर्ण जयन्ती महोत्सव सुरु भएको छ । “जीवन उपयोगी सहितको प्रविधिमैत्री शिक्षा, आ.बि. मादलेको प्रतिबद्धता” भन्ने मूल नाराका साथ विद्यालयले यहि जेठ ४ र ५ गते विभिन्न कार्यक्रमहरू आयोजना गर्दै महोत्सवको उत्सवपूर्ण सुरुवात गरेको हो ।

विद्यालय व्यवस्थापन समितिका अध्यक्ष मोहन बहादुर खत्रीका अनुसार, आज वडा नम्बर ५ अन्तर्गत रुपाटार क्षेत्रभित्रका अन्तरविद्यालय स्तरिय हाजिरीजवाफ प्रतियोगिता, राष्ट्रिय पहिचान झल्काउने सांस्कृतिक कार्यक्रम, तथा पूर्व विद्यार्थी मिलन कार्यक्रम सफलता साथ सम्पन्न गरिएको छ । विद्यालयका प्रधानाध्यापक शिबराज भुजेलका अनुसार, जेठ ५ गतेको मुख्य समारोहमा स्वर्ण जयन्ती अवसरमा निर्माण गरिएको सरस्वती मन्दिर तथा स्मारिकाको उद्घाटन गरिनेछ । साथै, विद्यालयमा सहयोग गर्ने चन्दादाताहरुलाई सम्मान तथा प्रशंसा पत्र प्रदान गरिने कार्यक्रम पनि तय गरिएको छ ।

यसै क्रममा आज सम्पन्न अन्तरविद्यालय कार्यक्रमको पुरस्कार वितरण पनि जेठ ५ गते नै गरिने सहकर्मी ठविन्द्र मगरले जानकारी दिनुभयो । विद्यालय प्रशासनका अनुसार स्वर्ण जयन्ती समारोहलाई भव्य रूपमा सम्पन्न गर्ने लक्ष्य लिएको छ । यो स्वर्ण जयन्ती महोत्सवले विद्यालयको समग्र प्रगति, शिक्षा र समृद्धिको यात्रालाई पुनः स्मरण गर्दै समुदायमा शिक्षा प्रतिको प्रतिबद्धता अझै प्रगाढ बनाउने अपेक्षा गरिएको छ ।