खरिखोला आधारभूत अस्पतालबाट २ सय बढी नागरिकले लिए नि:शुल्क दन्त सेवा

जेठ ४, सोलुखुम्बु । सोलुखुम्बुको खुम्बु पासाङल्हामु गाउँपालिका–१ स्थित खरिखोला आधारभूत अस्पतालमा सञ्चालित नि शुल्क दन्त स्वास्थ्य शिविरबाट २ सयभन्दा बढी नागरिकले सेवा प्राप्त गरेका छन् । शनिबारबाट सुरु भएको शिविरमा ६२ जनाको दाँत निकालिएको, ७४ जाको दाँभ भरिएको र १० जनाको सामान्य चेकजाच गरिएको जनाइएको छ ।

खुम्बु पासाङल्हामु गाउँपालिका र सोलुखुम्बु डेण्टलको आयोजनामा तथा वडा नम्बर १ को समन्वयमा सञ्चालन गरिएको उक्त शिविरमा अनुभवी तथा दक्ष दन्त चिकित्सक र दन्त स्वास्थ्यकर्मीको टोली परिचालन गरिएको छ । शिविरमा दाँत झिक्ने, भर्ने, सफा गर्ने लगायतका सेवा प्रदान गरिएको आयोजकले जनाएको छ। दुई दिनसम्म सञ्चालन भएको शिविर आइतबारसम्म जारी रहेको थियो । स्थानीय बासिन्दाले दुर्गम क्षेत्रमै गुणस्तरीय तथा निस्शुल्क दन्त सेवा पाउँदा खुसी व्यक्त गरेका छन् ।