सोलुदुधकुण्ड २ र स्तुपा सामुदायिक अस्पताल बिच सहकार्य : अब काठमाडौंको स्तूपा अस्पतालमा सस्तोमा उपचार पाउने सोलुखुम्बुका नागरिकहरू

जेठ ६, सोलुखुम्बु । सोलुखुम्बुको सोलुदुधकुण्ड नगरपालिका–२ र काठमाडौंको चुच्चेपाटीस्थित स्तूपा सामुदायिक अस्पतालबीच विशेष सम्झौता भएसँगै अब सोलुदुधकुण्ड–२ का बासिन्दाले काठमाडौंमै सस्तो दरमा गुणस्तरीय स्वास्थ्य सेवा पाउने भएका छन् । २०८२ जेठ १ गतेदेखि लागू हुने गरी एक वर्षका लागि गरिएको उक्त सम्झौताले दुर्गम सोलुखुम्बुका नागरिकहरूलाई राजधानीमा उपचार गराउँदा थप सहजता ल्याउने अपेक्षा गरिएको छ ।

सम्झौताअनुसार, स्तूपा सामुदायिक अस्पतालले सोलुदुधकुण्ड नगरपालिका–२ मा बसोबास गर्ने नागरिकहरूलाई परिचय खुल्ने कागजात र वडाको सिफारिसका आधारमा विभिन्न सेवा शुल्कमा उल्लेखनीय छुट दिनेछ । यसअन्तर्गत ओपीडी सेवा, इन्भेष्टिगेसन, शल्यक्रिया र बेड चार्जमा क्रमशः २५, २५, १५ र २५ प्रतिशत छुट दिइनेछ । सम्झौतापत्रमा अस्पतालका निर्देशक डा. पेम्बा लामा र वडा अध्यक्ष डवाङ ठिले शेर्पाले हस्ताक्षर गर्नुभएको छ । वडाध्यक्ष शेर्पाका अनुसार, वडाभित्र सीमित स्वास्थ्य सेवा भएकाले राजधानीमा पनि उपचारको विकल्प खोज्नुपर्ने बाध्यता थियो । त्यही परिप्रेक्ष्यमा स्तूपा अस्पतालसँग सहकार्य गरिएको हो ।

“हामीले विशेषतः विपन्न, गरिब र सेवा प्राप्त गर्न कठिनाइ भएका वर्गहरूलाई ध्यानमा राखेर यो व्यवस्था गरेका हौं,” वडाध्यक्ष शेर्पाले बताउनुभयो । सम्झौताले वडाका कर्मचारीहरूलाई पनि छुटको व्यवस्था गरेको छ भने बिरामीले सेवा लिनुअघि वडा कार्यालयमा जानकारी गराई सिफारिस लिनुपर्ने व्यवस्था गरिएको छ । स्वास्थ्य सेवा सहजीकरणमा सक्रिय योगदान पु‍र्याउने छिरिङ दोर्जीलाई वडाध्यक्ष शेर्पाले विशेष धन्यवाद ज्ञापन गरेका छन् ।

हाल सोलुदुधकुण्ड क्षेत्रका विभिन्न बस्तीहरूमा लोरिन नेपाल, कुशुदेबु र नेपालमेड जस्ता संस्थाहरूको सहयोगमा स्वास्थ्य सेवा प्रदान हुँदै आएको छ । काठमाडौंको स्तूपा अस्पतालसँगको यो नयाँ साझेदारीले वडाबासीलाई थप राहत दिने अपेक्षा गरिएको छ ।