इकोहिमाल नेपाल र महाकुलुङ गाउँपालिकाको संयुक्त आयोजनामा किशोरी सञ्जाल गठन सम्बन्धी अभिमुखीकरण कार्यक्रम

जेठ ५, सोलुखुम्बु । इकोहिमाल नेपाल र महाकुलुङ गाउँपालिकाको संयुक्त आयोजना तथा गाउँपालिकाको सामाजिक विकास शाखाको समन्वयमा पालिका स्तरीय किशोरी सञ्जाल गठनसम्बन्धी एकदिने अभिमुखीकरण कार्यक्रम सम्पन्न भएको छ । कार्यक्रम वडा नम्बर १ का सामाजिक विकास संयोजक पर्खिधन राईको अध्यक्षता, निमित्त प्रशासकीय अधिकृत झमक बहादुर कट्टवालको प्रमुख आतिथ्यता तथा कार्यपालिका सदस्य दौलित राईको विशेष उपस्थितिमा सम्पन्न भएको जनाईएको छ ।

कार्यक्रममा गाउँपालिका अन्तर्गत रहेका १० वटा विद्यालयका किशोरी सरक्षक शिक्षक तथा किशोरीहरूको उल्लेख्य सहभागिता रहेको थियो । सहकर्मी झलक राईका अनुसार अभिमुखीकरण कार्यक्रममा किशोरी सञ्जाल गठनको उद्देश्य, आवश्यकता र कार्यक्षेत्रबारे विस्तृत जानकारी दिइएको थियो ।

साथै किशोरीहरूलाई आत्मविश्वास अभिवृद्धि, नेतृत्व विकास, लैङ्गिक समानता, तथा स्वास्थ्य जनचेतनाका विषयमा समेत जानकारी प्रदान गरिएको थियो । कार्यक्रमले किशोरीहरूलाई संगठित रूपमा समुदायमा सकारात्मक परिवर्तन ल्याउने दिशामा उन्मुख गराउने विश्वास आयोजक संस्थाहरूले व्यक्त गरेका छन् ।