आधारभूत विद्यालय मादलेको स्वर्ण जयन्ती महोत्सव भव्य रूपमा सम्पन्न

जेठ ५, सोलुुखुम्बु । जीवन उपयोगी तथा प्रविधिमैत्री शिक्षाको मूल नारा सहित स्थापित विद्यालयले आफ्नो ५० औं वर्षगाँठ (स्वर्ण जयन्ती) विभिन्न कार्यक्रमहरूको आयोजना गरी भव्य रुपमा सम्पन्न गरेको छ । वि.सं. २०३१ सालमा स्थापना भएको यस विद्यालयको शैक्षिक तथा भौतिक विकासका लागि निःशुल्क जग्गा दान गर्ने स्वं जुद्ध बहादुर राउत तथा श्रीमती जसोदा राउतको योगदान उल्लेखनीय रहेको छ ।

उक्त योगदानको स्मृतिमा छोरा टिकाराम राउत तथा विद्यालयका संस्थापक युवराज राउतसमेत उपस्थित रहनुभएको थियो । स्वर्ण जयन्तीको अवसरमा विद्यालय परिसरमा सरस्वती मन्दिर तथा स्वर्ण स्मारक निर्माण गरिएको छ, जसको उद्घाटन प्रमुख अतिथि युवराज राउतले गर्नुभएको हो । कार्यक्रममा विद्यालयको विकासमा सहयोग गर्ने दाताहरुलाई सम्मान गरिएको सहकर्मी ठबिन्द्र मगरले जानकारी दिनुभयो ।

४० हजार रुपैयाँभन्दा माथि सहयोग गर्ने महानुभावहरुलाई फोटोसहित शिलालेखमा नाम अभिलेख गरिनुका साथै कदरपत्र प्रदान गरिएको छ भने २ हजार रुपैयाँभन्दा माथि सहयोग गर्नेहरूलाई नामसहितको शिलालेख र सम्मानपत्र प्रदान गरिएको छ । सोभन्दा कम सहयोग गर्नेहरुको नाम विद्यालयको अभिलेखमा राखिने आयोजक समितिका अध्यक्ष तथा शिक्षक अभिभावक संघका अध्यक्ष काशिराज खड्काले जानकारी दिनुभयो । यस अवसरमा विद्यालयले अन्तर विद्यालयस्तरीय हाजिरीजवाफ प्रतियोगिता तथा सांस्कृतिक कार्यक्रमको पनि आयोजना गरेको थियो । सहभागी समूहहरूलाई सोही दिन पुरस्कार वितरण गरिएको छ ।

कार्यक्रममा बोल्दै यसै विद्यालयका पूर्व विद्यार्थी तथा गाईघाटस्थित बालमन्दिर माविका प्रधानाध्यापक जङ्ग बहादुर खड्का (जे.बी.) ले प्रविधिमैत्री तथा गुणस्तरीय शिक्षाका लागि स्थानीय सरकारको विशेष भूमिका रहेको बताउँदै अंग्रेजी माध्यममा पठनपाठन सञ्चालन गर्न आफनो तर्फबाट पूर्ण सहयोग रहने प्रतिबद्धता जनाउनुभयो । त्यसैगरी विद्यालयको स्वर्ण जयन्तीको अवसरमा विशेष स्मारिका प्रकाशन गर्ने तयारी समेत भइरहेको स्मारिका प्रकाशन समितिका संयोजक तथा विद्यालयका पूर्व प्रधानाध्यापक डिक बहादुर खड्काले जानकारी दिनुभयो । उद्घाटन समारोह विद्यालय व्यवस्थापन समितिका अध्यक्ष मोहन बहादुर खत्रीको अध्यक्षता तथा संस्थापक युवराज राउतको प्रमुख आतिथ्यतामा सम्पन्न भएको थियो ।