सोलुमा राष्ट्रिय निकुञ्ज तथा वन्यजन्तु आरक्षको सुरक्षाबारे अन्तरक्रिया कार्यक्रम

जेठ ७, सोलुखुम्बु । सोलुखुम्बुको सदरमुकाम सल्लेरीमा राष्ट्रिय निकुञ्ज तथा वन्यजन्तु आरक्षको सुरक्षाबारे अन्तरक्रिया कार्यक्रम आयोजना गरिएको छ । बुधबार रक्षा मन्त्री मानवीर राईको प्रमुख आतिथ्यतामा उक्त कार्यक्रम आयोजना गरिएको हो । कार्यक्रममा सेना, सशस्त्र प्रहरी, वन विभागका प्रतिनिधि तथा सरोकारवाला निकायहरूको उल्लेखनीय उपस्थिति रहेको थियो ।

कार्यक्रमको उद्देश्य राष्ट्रिय निकुञ्ज तथा संरक्षित क्षेत्रहरूको सुरक्षा व्यवस्थालाई सुदृढ गर्दै जैविक विविधताको संरक्षणमा सुरक्षाकर्मीहरूको भूमिका अझ प्रभावकारी बनाउनु रहेको आयोजकले जनाएको छ । कार्यक्रमलाई रक्षामन्त्री राईले सम्बोधन गर्दै प्राकृतिक सम्पदा र जैविक विविधताको संरक्षणमा सुरक्षाकर्मीहरूको योगदानलाई उच्च मुल्याङकन गर्नुभयो । उहाँले निकुञ्ज तथा संरक्षित क्षेत्रहरूमा भइरहेको गैरकानुनी गतिविधिहरू नियन्त्रणका लागि कडा निगरानी र समन्वय आवश्यक रहेको पनि औँल्याउनुभयो ।

कार्यक्रममा प्रमुख जिल्ला अधिकारी अनोज कुमार घिमिरेले सगरमाथा राष्ट्रिय निकुञ्जमा उत्पन्न भइरहेका समस्याप्रति चिन्ता व्यक्त गर्दै सरोकारवालाहरूलाई गुनासो मात्र होइन, जिम्मेवारीका साथ कार्य गर्न आग्रह गर्नुभयो । यस्तै सगरमाथा राष्ट्रिय निकुञ्ज कार्यालयका बरिष्ठ संरक्षण अधिकृत सुस्मा रानाले निकुञ्जको विस्तृत विवरण प्रस्तुत गर्दै हेलिकप्टर उडान, वन्यजन्तु क्षति, छाडा पशु चरन, कुकुर व्यवस्थापनको अभाव लगायतका समस्याहरूबारे जानकारी दिनुभयो । साथै, सुरक्षाकर्मीहरूले निकुञ्जमा देखिएका चुनौती र प्राप्त उपलब्धिहरू मन्त्रीसमक्ष राखेका छन् ।

अन्तरक्रियामा संरक्षणका क्षेत्रमा देखिएका चुनौतीहरू, सुरक्षाकर्मीहरूको क्षमता अभिवृद्धि, स्थानीय समुदायसँगको सहकार्य तथा प्रविधिको प्रयोगबारे पनि गहन छलफल भएको थियो । सहभागीहरूले नीति निर्माणदेखि कार्यान्वयन तहसम्म सबै पक्षबीच एकता आवश्यक रहेकोमा जोड दिँदै कार्यक्रमले संरक्षण सुरक्षालाई थप प्रभावकारी बनाउने अपेक्षा गरिएको बताइएको छ ।