रीड नेपालको आयोजनामा आधारभूत तह (कक्षा १-३) का शिक्षकहरुका लागि एक महिने प्रमाणीकरण तालिम सुरु

जेठ ७, साेलुखुम्बु । रीड नेपालको आयोजना, अस्ट्रेलियन एड र अष्ट्रेलियन हिमालयन फाउन्डेसनको आर्थिक सहयोग तथा शिक्षा तालिम केन्द्र सुनसरी, शिक्षा विकास तथा समन्वय इकाइ सोलुखुम्बु र सोलुखुम्बु जिल्लाका स्थानीय तहहरु सोलु दुधकुण्ड नगरपालिका र थुलुङ दुधकोशी , माप्य दुधकोशी, नेचासल्यान, सोताङ, महाकुलुङ र लिखुपिके गाउँपालिकाहरुको समन्वयमा सोलुखुम्बुको सल्लेरी स्थित जन जागृति मा वि सल्लेरीमा आधारभूत तह (कक्षा १-३) का शिक्षकहरुका लागि एक महिने प्रमाणीकरण तालिमको पहिलो खण्ड १५ दिने आमनेसामने (Face to Face) तालिम आज बाट सुरु भएको छ ।

रीड नेपालका शिक्षा विकास संयोजक केशवदेव गिरीको अध्यक्षता तथा सोलुदुधकुण्ड नगरपालिकाका प्रमुख प्रशासकीय अधिकृत टुक्ति शेर्पाको प्रमुख आतिथ्यतामा कार्यक्रमकाे उद्घाटन गरिएकाे हाे ।

यस्तै, कार्यक्रममा शिक्षा विकास तथा समन्वय इकाइका निमित्त प्रमुख बिर्मा डाँगी र ज जा मा वि का प्रअ जनक कुमार थापाको पनि उपस्थिति रहेको थियो ।
तालिममा अतिथिहरुले रीड नेपालको कार्यक्रमको प्रशंसा गर्दै नेपाल सरकारले संचालन गर्ने तालिम रीड नेपालले सम्बन्धित निकायसंग समन्वय गरेर जिल्लामा नै संचालन गरेकोमा धन्यवाद दिदैँ खुसी व्यक्त गरेका थिए ।

तालिममा नगरपालिका तथा विभिन्न गाउँपालिकाका वि.सं. २०७९ अगावै प्रा वि तह स्थायी भएका र अहिलेसम्म प्रमाणीकरण तालिम नलिएका ३९ जना शिक्षकहरुको सहभागिता रहेको संयोजक केशवदेव गिरीले जानकारी दिनुभयाे ।

यस तालिम शैक्षिक जनशक्ति विकास परिषद्बाट स्वीकृत पाठ्यक्रमको आधारमा संचालन गरिने आयोजकले बताएकाे छ ।
तालिमको सहजीकरण उक्त तालिम सम्बन्धी प्रशिक्षक प्रशिक्षण लिएका सुनसरी तालिम केन्द्रका रोस्टर प्रशिक्षक तथा रीड नेपालका शिक्षा विकास संयोजक केशवदेव गिरी, र रीड नेपालका तालिम प्रशिक्षक वासु वाग्लेलगाएतका रीड नेपालका विषय विज्ञहरुले गरिरहनु भएको छ ।

यस अगाडी पनि रीड नेपालले सोलुखुम्बुका शिक्षकको पेसागत विकासका लागि विभिन्न चरणमा प्रमाणीकरण तालिम संचालन गरेर प्रमाणपत्र वितरण गरिसकेकाे छ ।
यस्ताे प्रभावकारी तालिम जिल्ला बाहिर गएर लिनु पर्ने तर आफ्नै जिल्लामा लिन पाउदा सहभागी शिक्षकले खुसी व्यक्त गर्दै रीड नेपाललाई धन्यवाद दिएका छन् ।