शेर्पा बालबालिका सहायता संघको पहलमा सोलुखुम्बुका ५१४ जना विद्यार्थीलाई छात्रावृत्ति प्रदान

जेठ ७, सोलुखुम्बु । सोलुखुम्बुका विभिन्न विद्यालयमा अध्ययनरत ५१४ जना विद्यार्थीलाई छात्रावृत्ति प्रदान गरिएको छ । शेर्पा बालबालिका सहायता संघको विशेष पहलमा र फ्रान्सस्थित लोरेन नेपालको आर्थिक सहयोगमा आज फाप्लु, सल्लेरी र लुरा लगायत छुटेका १ सय ५ जना विद्यार्थीलाई छात्रावृत्ति प्रदान गरेसँगै उक्त कार्यक्रम समेत सम्पन्न भएको संघका संयोजक सन्त बहादुर मगर (र्याबिट) ले बताउनुभयो ।

उहाँका अनुसार, बैशाख ३० गतेदेखि सुरु गरिएको यो कार्यक्रम अन्तर्गत करिब ४५ लाख रुपैयाँ बराबरको छात्रावृत्ति वितरण गरिएको छ । छात्रवृत्तिका रूपमा प्रत्येक विद्यार्थीलाई नियमित बार्षिक ७ हजार र प्रायोजकबाट थप गरिएको रकम वितरण गरिएको जनाइएको छ । यता नियमित रुपमा छात्रावृत्ति लिदै आएका तर यस बर्ष लिन नआएका विद्यार्थीहरुलाई आगामी दिनमा समावेशन नगरिने संघले जनाएको छ ।

यस्तै संघका अध्यक्ष निमा शेर्पाले हाल छात्रवृत्ति प्राप्त गरेका विद्यार्थीहरूमध्ये आगामी वर्ष सोलुखुम्बु बहुमुखी क्याम्पसमा स्नातक तहमा अध्ययन गर्नेहरुलाई समेत छात्रावृत्ति निरन्तरता दिइने जानकारी दिनुभयो । साथै, जिल्लाका विभिन्न विद्यालयका आर्थिक रूपमा कमजोर तथा जेहेन्दार ३५ जना विद्यार्थीका लागि विद्यालय र समितिको सिफारिसमा थप आर्थिक सहयोग जुटाउन अपिलसमेत गरिएको छ ।

शेर्पा बालबालिका सहायता संघले दुर्गम हिमाली क्षेत्रका बालबालिकालाई शिक्षामा पहुँच सहज बनाउन यो कार्यक्रम अघि बढाएको र यसले ग्रामीण भेगमा शिक्षाको विकासमा महत्वपूर्ण योगदान पु‍र्याउने विश्वास लिएको जनाएको छ ।