ताप्ली गाउँपालिकामा सघन कृषि विकास कार्यक्रम सञ्चालन – कृषि व्यवसायमा व्यापक छलफल

जेठ ७, सोलुखुम्बु । उदयपुरको ताप्ली गाउँपालिकामा सघन कृषि विकास कार्यक्रम अन्तर्गत वडा स्तरीय छलफल कार्यक्रमहरू भव्य रुपमा सुरु भएका छन् । गाउँपालिकाका कृषि विज्ञ डा. यादव हुमागाईको उपस्थितिमा ५ गतेदेखि सुरु भएका छलफलहरूमा कृषकहरू, टोल विकास संस्था, राजनीतिक दल, समाजका अगुवाहरू, शिक्षक, बुद्धिजीवी तथा जनप्रतिनिधिहरूको सक्रिय सहभागिता रहेको छ । गाउँपालिकाले चालु आर्थिक वर्षदेखि खाली र बाँझो रहेका खेतियोग्य जमिनलाई न्यूनतम भाडामा (लीजमा) लिएर उत्पादनमुखी कृषि तथा पशुपालन व्यवसाय सञ्चालन गर्ने योजना सार्वजनिक गरेको छ । यस योजनाअन्तर्गत प्रत्येक वडामा कम्तिमा ५ वटा एकरूप व्यवसायिक परियोजना संचालन गरिनेछ ।
वडागत कृषि योजना यस्तो छ ?
ईनामे वडामा : आलु, राज्मा (बोडी), भटमास, तोरी, कागती तथा बङ्गुर, भैसी र खसीबाख्राको व्यवसायिक उत्पादनमा प्राथमिकता ।

लेखागाउँ वडा : सुन्तला, तेजपत्ता, खसीबाख्रा, बङ्गुर र भैसी पालनमा केन्द्रीत ।

ओख्ले वडामा : सुन्तला, अलैँची, किवी, तेजपत्ता, खसीबाख्रा, बङ्गुर र भैसीमा व्यवसायिक लगानी ।

रुपाटार वडामा : कालो दाल, मास दाल, आँप, लिची, अदुवा, धान, खसीबाख्राको उत्पादनमा जोड ।

ठानागाउँ वडामा : आँप, धान, बङ्गुर, खसीबाख्रा, भैसी, अदुवा लगायतका क्षेत्रमा विस्तार ।
गाउँपालिकाले योजना अनुसार कृषक तथा सहकारीहरूमार्फत बजेट, मल, बिउ तथा बजारको सुनिश्चिततासहित आवश्यक सम्पूर्ण सहुलियत प्रदान गर्ने सहकर्मी ठबिन्द्र मगरले जानकारी दिनुभयो । उपाध्यक्ष धनमाया मगरका अनुसार, “यस पटकको कार्यक्रम फरक ढंगले अघि बढाइएको छ । अब कृषिलाई व्यवसायिक बनाउने, उत्पादन र रोजगारीमा जोड दिने, शिक्षामा कृषिको समावेशीकरण गर्ने तथा कृषकहरूलाई उद्यमीको रूपमा विकास गरिनेछ ।” कार्यक्रम ९ गतेसम्म प्रत्येक वडामा निरन्तर सञ्चालन हुनेछ । सहभागीहरूको सुझाव र छलफलका आधारमा कार्यक्रमलाई अझ प्रभावकारी बनाउँदै लैजाने योजना गाउँपालिकाले बनाएको छ ।