ह्वाइट हिल्स बोर्डिङ स्कुलमा भलिबल प्रतियोगिता सम्पन्न

जेठ ९, सोलुखुम्बु । विद्यार्थीहरूको बहुआयामिक विकासलाई लक्ष्य राखी सोलुखुम्बु जिल्लाको सोलुदुधकुण्ड नगरपालिका–५ मा अवस्थित ह्वाइट हिल्स बोर्डिङ स्कुलले हरेक शुक्रबार नियमित रूपमा अतिरिक्त कार्यक्रम सञ्चालन गर्दै आइरहेको छ । यसै सिलसिलामा आज विद्यालय परिसरमा भलिबल प्रतियोगिता सम्पन्न गरिएको छ ।

विद्यालयले कक्षा सञ्चालनसँगै विद्यार्थीहरूको शारीरिक, मानसिक र सामाजिक विकासका लागि यस्ता कार्यक्रमहरूलाई विशेष प्राथमिकता दिँदै आएको छ । आजको कार्यक्रममा विद्यार्थीहरूलाई समूहगत रुपमा विभाजन गरी पुरुष र महिला तर्फ छुट्टाछुट्टै भलिबल प्रतियोगिता आयोजना गरिएको थियो । प्रतियोगितामा पुरुष तर्फ रेड हाउस र महिला तर्फ ग्रिन हाउस विजयी भएका छन् । विद्यालयका प्रधानाध्यापक सन्तोष सुब्बाले “शैक्षिक पाठ्यक्रम मात्रै पर्याप्त हुँदैन, विद्यार्थीहरूलाई आत्मविश्वासी, अनुशासित र सहकार्य गर्न सक्ने बनाउने सिप अतिरिक्त कार्यक्रममार्फत विकास गर्न सकिन्छ ।

यस्ता गतिविधिले उनीहरूको शारीरिक स्वास्थ्यसँगै मानसिक सन्तुलनमा समेत सकारात्मक असर पार्दछ ।” विद्यालयका शिक्षक, अभिभावक तथा विद्यार्थीहरूले समेत यस्ता कार्यक्रमको सराहना गरेका छन् । यस किसिमका अतिरिक्त गतिविधिहरूले विद्यार्थीहरूलाई स्वाभाविक रूपमा नेतृत्व, सहकार्य र प्रतिस्पर्धाको भावना विकास गर्न मद्दत पुग्ने विश्वास गरिएको छ ।