स्व. दमाई सर्की शेर्पाको सम्झनामा निर्मित शालिक अनावरण तथा सातौं पुण्यतिथिमा श्रद्धाञ्जली कार्यक्रम

जेठ ९, सोलुखुम्बु । सोलुखुम्बुको खुम्बु पासाङल्हामु गाउँपालिका, वडा नम्बर १, बुक्सा निवासी स्वर्गीय दमाई सर्की शेर्पाको सातौं पुण्यतिथिको अवसरमा एक विशेष सम्मान समारोह तथा श्रद्धाञ्जली कार्यक्रम सम्पन्न गरिएको छ । सगरमाथा आरोहणबाट फर्कने क्रममा २०७५ साल जेठ ७ गते उहाँको निधन भएको थियो । उहाँको साहस, समर्पण र प्रेरणादायी यात्राको सम्मानस्वरूप निर्मित शालिक सार्वजनिक रूपमा अनावरण गरिएको हो ।

कार्यक्रममा प्रमुख अतिथिको रूपमा सहभागी भएका वडा अध्यक्ष फुनुरु शेर्पाले आयोजक संस्था कोङ्दे युवा क्लबलाई धन्यवाद ज्ञापन गर्दै स्व. शेर्पाको योगदान सधैं प्रेरणादायी र मार्गदर्शक बन्ने उल्लेख गर्नुभयो । कार्यक्रममा क्लबलाई दुई रोपनी जग्गा निःशुल्क प्रदान गर्नु भएकी आमा मिङ्मा डोमा शेर्पा र श्रीमती फुर याङ्जी शेर्पालाई विशेष सम्मान गरिएको छ ।

वडा अध्यक्ष शेर्पाले यो योगदानले क्लबका आगामी योजना र गतिविधिहरूलाई थप सशक्त र दीगो बनाउने विश्वास व्यक्त गर्नुभयो । उक्त कार्यक्रममा संस्थापक अध्यक्ष पेम्बा जाङ्बु शेर्पा, क्लबका कोषाध्यक्ष तथा सभापति फुर्तेन्जी लामा, दाताहरू, स्वयंसेवीहरू र स्थानीय समुदायका प्रतिनिधिहरूको उल्लेखनीय उपस्थिति रहेको थियो । कार्यक्रमले स्व. शेर्पाको सम्झनालाई अझ जीवन्त बनाउने तथा स्थानीय युवाहरूलाई सेवा र समर्पणको भावनामा उर्जा थप्ने विश्वास गरिएको छ ।