सडक भत्काएपछि आफै पुननिर्माण गरेकामा काठ व्यवसायीलाई सोलुदुधकुण्ड नगरपालिकाको धन्यवाद

जेठ १२, सोलुखुम्बु । काठ व्यवसायीहरुले आफ्नो गल्ती स्वीकार्दै क्षति पुगेको सडक आफैँ पुननिर्माण गरेपछि सोलुदुधकुण्ड नगरपालिकाले उनीहरूलाई धन्यवाद निएका छन् । यसले समुदायमा उत्तरदायित्वबोध र सहकार्यको उत्कृष्ट उदाहरण प्रस्तुत गरेको छ । केही समय अघि सोलुदुधकुण्ड नगरपालिकाको केन्द्र सल्लेरी र वडा नम्बर ३ तामाखानी जोड्ने मुख्य सडकखण्डमा काठको मुढा खसाल्दा करिब ३५.५० मिटर लम्बाइको सडकका भाग भत्किएको थियो ।

घटनापछि नगरपालिकाका प्रमुख प्रशासकीय अधिकृत टुक्ति शेर्पा स्वयं प्राविधिक टोलीसहित घटनास्थल निरीक्षणमा निस्कनुभएको थियो । निरीक्षण पश्चात क्षतिको मूल्यांकन गरी सम्बन्धित व्यवसायीलाई जिम्मेवारी तोकिएको थियो । व्यवसायीहरूले नगरपालिकासँग गरिएको प्रतिबद्धता अनुसार आफैँ प्राविधिक स्टिमेट र सल्लाह बमोजिम सडक पुनः निर्माण गरेका छन् ।

नगरका प्रमुख प्रशासकीय अधिकृत टुक्ति शेर्पाले व्यवसायीहरुले गल्तीलाई नकार्नुको सट्टा सुधार्ने प्रयास गरेकामा प्रसंसा गर्दै, “सडक निर्माणमा देखाइएको ईमानदारी र उत्तरदायित्वबोधले अन्य व्यवसायीहरुलाई पनि राम्रो सन्देश दिन्छ,” भन्दै धन्यवाद दिनुभयो । आइतबार सम्पन्न ढलान कार्यको अनुगमन नगर प्रहरी सहायक निरीक्षक ङवाङ ठिन्ले शेर्पा नेतृत्वको टोलीले गरेको थियो । निरीक्षणका क्रममा कार्य गुणस्तरीय र पूर्व निर्धारित मापदण्ड अनुसार गरिएको पुष्टि भएको छ ।