महिलाहरूका लागी स्कुल ब्याग बनाउने तालिम, तालिम सकिएकै दिन व्यवसायको उद्‌घाटन 

जेठ १२, सोलुखुम्बु । सोलुखुम्बुमा महिलाहरूलाई स्कुल ब्याग (विद्यालय झोला) बनाउने तालिम दिइएको छ ।  जिल्लाको सोलुदुधकुण्ड नगरपालिका वडा नम्बर ६ का महिलाहरूलाई स्कुल ब्याग बनाउने तालिम दिइएको हो । गरिबी निवारणका लागी लघु उद्यम विकास कार्यक्रम मेड्पा अन्तर्गत वडाका ७ जना महिलाहरूलाई ब्याग बनाउन एक महिने तालिमको आज सोमबार समापन गरिएको हो ।

 स्थानीय स्तरमै स्कुल ब्यागको उत्पादन गरि सुलभ र सस्तो मूल्यमा विद्यार्थीहरूलाई उपलब्ध गराउने गरि तालिम दिइएको वडा नम्बर ६ का अध्यक्ष फुर्वा ग्याल्जेन शेर्पाले बताउनुभयो । सोलुदुधकुण्ड नगरपालिकाको सहकार्यमा सञ्चालित मेड्पा कार्यक्रम अन्तर्गत स्कुल ब्याग बनाउने तालिम गत बैशाख १४ गतेबाट सुरु भएर आज सम्पन्न भएको हो । यस तालिमले उनिहरुलाई आत्मनिर्भर बन्न सहज हुने अध्यक्ष शेर्पाले बताउनुभयो । 

 लिएको तालिम र सीपलाई सहि सदुपयोग गरेर आत्मनिर्भरताको बाटो रोज्न उहाँले समापन कार्यक्रममा बोल्ने क्रममा अनुरोध गर्नुभएको छ ।    यसैबीच सिप विकास तालिम लिएका २ जना महिलाहरुले तालिम समापन भएकै दिन व्यवसायीक झोला उत्पादन सुरु गरेका छन् । स्थानीय सरिता घतानी र मिना घतानीले वडा नम्बर ६ कै थातिङमा तालिम समापन भएकै दिन झोला उत्पादन व्यवसाय सुरु गरेका हुन । उनिहरूले स्कुल व्याग, तरकारी बाेक्ने झाेला लगायत विभिन्न खालका झाेलाहरू निर्माण गर्न सक्ने जनाइएकाे छ ।  यसले साेलुदुधकुण्ड नगरपालिकाले लिएकाे प्लाष्टिक मुक्त नगरपालिका बनाउने अभियानमा सहयाेग गर्ने अपेक्षा गरिएकाे छ ।  

उनिहरुले सुरु गरेको व्यवसायको वडा अध्यक्ष शेर्पाले रिबन काटेर उद्‌घाटन गर्नुभएको छ  । एक महिना सम्म सञ्चालन भएको तालिमको सहजिकरण सिन्धुलिका खिलराज श्रेष्ठले गर्नुभएको थियो ।  समापन कार्यक्रममा अध्यक्ष शेर्पा सहित प्रशिक्षार्थी महिलाहरू, मेड्पा प्रतिनिधीहरुको उपस्थिति रहेको थियो ।