याङडी लामा शेर्पा बनिन् सगरमाथा चढ्ने पहिलो एथलेटिक्स महिला

जेठ १२, सोलुखुम्बु । सोलुखुम्बुको सोलुदुधकुण्ड नगरपालिका–१ टाक्सिन्दुकी अल्ट्रा धाविका याङडी लामा शेर्पा सगरमाथाको सफल आरोहण गर्ने पहिलो एथलेटिक्स महिला बनेकी छिन् । उनले सन् २०२५ मे १९ तारिख बिहान ८ः२५ बजे विश्वको सर्वोच्च शिखर सगरमाथा (८,८४८.८६ मि) मा पाइला टेक्न सफल भएकी हुन् । साहसिक खेल र पर्वतारोहणमा विशेष रुचि राख्ने शेर्पाले यसअघि पनि विभिन्न आरोहण गर्दै अनुभव बटुल्दै आएकी थिईन् ।

हालै मात्र अप्रिल २२ मा उनले मेरापिक (६,४७६ मि) को सफल आरोहण गरेकी छिन् । खेलकुद क्षेत्रमा पनि उदाहरणीय सफलता हासिल गरिसकेकी शेर्पा तेन्जिङ हिलारी एभरेष्ट म्याराथनमा तीन पटक विजेता बनिसकेकी छिन् । आफ्नो फिटनेस, सहनशक्ति र आत्मबलका कारण उनले अल्ट्रा धावकको रूपमा छुट्टै पहिचान बनाउन सफल भएकी छिन् ।

सानै उमेरदेखि सगरमाथा चढ्ने सपना देख्दै आएकी याङदीको यो सफल आरोहणले उनको दीर्घकालीन सपना साकार भएको छ । उनको यो उपलब्धिले सोलुखुम्बु जिल्ला मात्र नभई समग्र देशको गौरव बढाएको छ । याङदी लामा शेर्पाले आगामी दिनमा पनि पर्वतारोहण र दौडको क्षेत्रमा सक्रिय रहने प्रतिबद्धता जनाएकी छिन् ।