तिङ्ला स्वास्थ्य चौकी भवन निर्माणको थालनी, मेयर शेर्पाद्वारा शिलान्यास

जेठ १३, सोलुखुम्बु । सोलुखुम्बुको सोलुदुधकुण्ड नगरपालिकाका मेयर नाम्गेल जाङ्बु शेर्पाले तिङ्ला स्वास्थ्य चौकी भवनको शिलान्यास गर्नुभएको छ । नगरपालिकाको वडा नम्बर ११ स्थित तिङ्ला स्वास्थ्य चौकीको नयाँ भवन निर्माणको लागि मंगलबार एक कार्यक्रमका बीच शिलान्यास गरिएको हो ।

सोलुदुधकुण्ड नगरपालिका र गैरसरकारी संस्था पाहिला पाहिलाको आशाको संयुक्त लागत साझेदारीमा कुल १ करोड १४ लाख ९१ हजार रुपैयाँ लागतमा भवन निर्माण हुने वडा कार्यालयले जनाएको छ । वि.सं २०८२ जेठ १३ गतेबाट ठेक्का सम्झौता भई २०८३ बैशाख २० गतेभित्र निर्माण सम्पन्न गर्ने गरी सम्झौता गरिएको हो । कार्यक्रममा बोल्दै मेयर शेर्पाले भवन निर्माण कार्य निर्धारित समयमै सम्पन्न गरि सेवा सञ्चालनमा ल्याइने प्रतिबद्धता व्यक्त गर्नुभयो ।

उहाँले यस स्वास्थ्य चौकीबाट स्थानीय नागरिकहरुले अझ सहज र गुणस्तरीय स्वास्थ्य सेवा पाउने विश्वास व्यक्त गर्नुभयो । पाहिला पाहिलाको आशाु संस्थाका प्रमुख डा. पासाङ काजी लामाले भवन निर्माणपश्चात तिङ्लाका गर्भवती महिलालाई फाप्लु अस्पताल जानुपर्ने बाध्यता अन्त्य हुने विश्वास व्यक्त गर्नुभयो । यस्तै वडा नम्बर ११ का अध्यक्ष टंक बहादुर कार्कीले आफू निर्वाचित भएदेखि स्वास्थ्य क्षेत्रलाई प्राथमिकतामा राख्दै आएको जानकारी दिनुभयो ।

त्यस्तै, वडा नम्बर ६ का अध्यक्ष तथा नगर प्रवक्ता फुर्वा ग्याल्जेन शेर्पाले नगरपालिकाले स्वास्थ्य, शिक्षा तथा पूर्वाधार विकासमा विशेष प्राथमिकता दिँदै विभिन्न योजना अघि बढाइरहेको जानकारी गराउनुभयो ।

नयाँ भवन आधुनिक संरचनामा निर्माण भई मातृ तथा शिशु स्वास्थ्य सेवा, नियमित उपचार, खोप सेवा लगायतका कार्यक्रमलाई अझ प्रभावकारी बनाउने अपेक्षा गरिएको छ । शिलान्यास कार्यक्रममा जनप्रतिनिधि, स्थानीय समाजसेवी, संस्था प्रतिनिधि तथा स्थानीय बासिन्दाहरूको उल्लेखनीय उपस्थिति रहेको थियो ।