तिङ्लाका सुनाखरी कृषक समूहलाई तीन वटा हाते ट्याक्टर वितरण

जेठ १३, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ११ स्थित तिङ्लाका सुनाखरी कृषक समूहलाई तीन वटा हाते ट्याक्टर वितरण गरिएको छ । नगरपालिकाको गरिबी निवारणका लागि लघु उद्यम विकास कार्यक्रम (मेड्पा) अन्तर्गत प्रविधि हस्तान्तरण कार्यक्रममार्फत उक्त कृषि उपकरण वितरण गरिएको हो । मंगलबार एक औपचारिक कार्यक्रमका बीच नगरप्रमुख नाम्गेल जाङ्बु शेर्पाको प्रमुख आतिथ्यता र वडा नम्बर ११ का अध्यक्ष टंक बहादुर कार्कीको अध्यक्षतामा हाते ट्याक्टर हस्तान्तरण गरिएको हो ।

कार्यक्रममा सोलुदुधकुण्ड नगरपालिका योजना शाखा प्रमुख रामकुमार खड्काले आधुनिक कृषि प्रणालीमा प्रवेश गर्न यस्ता उपकरणको महत्व रहेको बताउनुभयो । कार्यक्रममा बोल्दै मेयर शेर्पाले तिङ्लालाई अब परम्परागत कृषि प्रणालीबाट आधुनिक कृषि प्रणालीतर्फ रुपान्तरण गरिने प्रतिबद्धता जनाउनुभयो । उहाँले परम्परागत खेती प्रणालीबाट उत्पादन घट्दै गएको उल्लेख गर्दै आधुनिक उपकरणको प्रयोगले कृषकको श्रम बचाउने र उत्पादन बढाउने विश्वास व्यक्त गर्नुभयो । यस्तै नगर प्रवक्ता तथा वडा नम्बर ६ का अध्यक्ष फुर्वा ग्याल्जेन शेर्पाले समेत कृषकहरूको क्षमता अभिवृद्धि गर्न यस्ता कार्यक्रमहरू निरन्तर सञ्चालन गरिने जानकारी दिनुभयो । त्यस्तै वडा नम्बर ११ का अध्यक्ष टंक बहादुर कार्कीले कृषकहरूलाई उत्पादनमुखी र आत्मनिर्भर बनाउने उद्देश्यले अनुरुप काम गरिहेको बताउनुभयो ।

यो कार्यक्रमको उद्देश्य गरिबी निवारण, कृषिमा प्रविधिको प्रयोग बढाउँदै कृषकहरूको जीवनस्तर उकास्नु र कृषि उत्पादनमा वृद्धि गर्नु रहेको छ । सुनाखरी कृषक समूहलाई वितरण गरिएको हाते ट्याक्टरले तिङ्लामा कृषि यान्त्रीकरणको सुरुआत गरेको छ । यसले परिश्रमको खपत कम गरी समय र श्रम दुवै बचाउने अपेक्षा गरिएको छ । स्थानीय सरकारको पहलमा प्रविधि पहुँचमा ल्याउने प्रयासले कृषकमा उत्साह थपेको देखिन्छ । कार्यक्रमबाट प्रेरित भई अन्य कृषक समूहहरू पनि यान्त्रिक खेतीतर्फ उन्मुख हुने विश्वास लिइएको छ ।