कोशी प्रदेश सरकारद्वारा खोटाङ जिल्ला अस्पताल ५० शय्यामा स्तरोन्नति गर्ने निर्णय

जेठ १३, सोलुखुम्बु । कोशी प्रदेश सरकारले खोटाङको जिल्ला अस्पताललाई ५० शय्यामा स्तरोन्नति गर्ने निर्णय गरेको छ। सोमबार प्रदेश मुख्यमन्त्री हिक्मतकुमार कार्कीको अध्यक्षतामा बसेको मन्त्रिपरिषद् बैठकले हाल १५ शय्यामा सञ्चालन हुँदै आएको जिल्ला अस्पताललाई ५० शय्यामा विस्तार गर्ने निर्णय लिएको हो। वि.सं. २०४९ वैशाख १ गते स्थापना भएको यो अस्पताल विगत तीन दशकदेखि १५ शय्यामा सीमित रहँदै आएको थियो। स्वास्थ्यमन्त्री भूपेन्द्र राईले चालु वर्षको वैशाख १ गते अस्पताल स्तरोन्नतिको प्रस्ताव मन्त्रिपरिषदमा प्रस्तुत गर्नुभएको थियो।

५० शय्यामा स्तरोन्नतिका लागि निर्माण भइरहेको नयाँ भवनको काम अन्तिम चरणमा पुगेपछि मन्त्रीस्तरीय बैठकमार्फत प्रस्ताव पारित गरी मन्त्रिपरिषदमा पेश गरिएको थियो। साथै, स्वास्थ्यमन्त्री राईले यससँगै अस्पतालमा आवश्यक संरचना र जनशक्ति व्यवस्थापनको तयारीसमेत गरिएको जानकारी दिनुभयो। अबदेखि अस्पतालमा ११औँ तहको विशेषज्ञ चिकित्सकसहित ५९ जना स्वास्थ्यकर्मीको दरबन्दी कायम हुनेछ।

यसअघि अस्पतालमा आठौँ तहका चिकित्सकसहित ३० जना मात्र स्वास्थ्यकर्मी कार्यरत थिए। ३३ वर्षपछि भएको यो स्तरोन्नतिको निर्णयले खोटाङबासीमा खुसीको वातावरण सिर्जना गरेको छ। अस्पताल ५० शय्यामा स्तरोन्नति भएसँगै सबै प्रकारका बिरामीका लागि आवश्यक सेवा तथा उपचार सुविधा उपलब्ध गराइने स्वास्थ्यमन्त्री राईले बताउनुभयो। यस निर्णयले जिल्लावासीको स्वास्थ्य सेवामा पहुँच र गुणस्तरमा उल्लेखनीय सुधार आउने विश्वास गरिएको छ।