स्वर्गीय आमाबाबुको स्मृतिमा जुबुका दुई विद्यालयलाई अक्षय कोष स्थापना

जेठ १४, सोलुखुम्बु । समाजसेवी गोबरधन राईले आफ्नो स्वर्गीय आमाबाबुको स्मृतिमा स्थायी अक्षय कोष स्थापना गरी जुबु क्षेत्रको शैक्षिक उन्नतिमा अनुकरणीय योगदान पु‍र्याउनुभएको छ । सोलुखुम्बुको थुलुङदूधकोशी गाउँपालिका–४ जुबु स्थायी ठेगाना भई हाल काठमाडौँमा बसोबास गर्दै आउनु भएका गोबरधन राईले आमा स्वर्गीय नरमाया राईको पुण्य स्मृतिमा जनकल्याण माध्यमिक विद्यालय जुबुमा ५ लाख ३ हजार राशीको “नरमाया राई स्मृति अक्षय कोष” स्थापना गर्नुभएका विद्यालयका प्रधानाध्यापक कुमार बस्नेतले जानकारी दिनुभयो ।

यस्तै बुबा स्वर्गीय पदम बहादुर राईको स्मृतिमा हिमालय माध्यमिक विद्यालय जुबुमा सोही रकमको “पदम बहादुर राई स्मृति पुरस्कार अक्षय कोष” स्थापना गर्नुभएको विद्यालयका प्रधानाध्यपक खड्ग बहादुर भुजेलले जानकारी दिनुभयो । उहाँले स्थापना गर्नुभएको यी दुई कोषले विद्यार्थीहरूको प्रोत्साहन, शैक्षिक गुणस्तर अभिवृद्धि तथा शिक्षालयको दीर्घकालीन हितमा योगदान पुर्‍याउने विद्यालय प्रशासनको विश्वास छ ।

जनकल्याण मा.वि. जुबु तथा हिमालय म.वि. जुबुको संयुक्त विद्यालय परिवारले गोबरधन राई र उहाँको परिवारप्रति हार्दिक आभार व्यक्त गर्दै उहाँहरूका उत्तरोत्तर प्रगति, सुस्वास्थ्य र दीर्घायुको कामना गरेको छ । जुबु क्षेत्रको शैक्षिक क्षेत्रमा गरिएको यो योगदान अन्य समुदायका लागि पनि प्रेरणाको स्रोत बन्ने अपेक्षा गरिएको छ ।