रातमाटेमा चप्पल बनाउने ७ दिने सीप विकास तालिम सम्पन्न

जेठ १४, सोलुखुम्बु । ओखलढुंगाको चिशंखुगढी गाउँपालिका वडा नम्बर ४, रातमाटेमा सञ्चालन गरिएको ७ दिने चप्पल बनाउने सीप विकास तालिम समापन गरिएको छ । तालिम समापन कार्यक्रम वडा अध्यक्ष हिमाल राईको अध्यक्षता र चिशंखुगढी गाउँपालिकाका अध्यक्ष निशान्त शर्मा प्रमुख आतिथ्यमा सम्पन्न भएको हो ।

तालिम समापन कार्यक्रममा बोल्दै वडा अध्यक्ष हिमाल राईले स्थानीय स्तरमै रोजगारीको अवसर सिर्जना गर्न यस्ता सीपमूलक तालिमहरू आवश्यक रहेको बताउनुभयो । यस्तै गाउँपालिका अध्यक्ष निशान्त शर्माले चिशंखुगढी गाउँपालिकालाई उद्यमशीलता र स्वरोजगारको केन्द्र बनाउने लक्ष्य रहेको बताउनुभयो । युवाहरूलाई लक्षित गर्दै सीप विकासका कार्यक्रमहरू विस्तार गरिने उहाँको भनाई छ ।

कार्यक्रममा सहभागी स्थानीय युवाहरूले यस्ता तालिमहरूबाट आफूहरू उत्साहित भएको बताउँदै तालिमले भविष्यमा स्वरोजगारको बाटो खोल्ने विश्वास व्यक्त गरेका छन् । गाउँपालिकाको गरिबी निवारणको लागी लघु उद्यम विकास कार्यक्रम अन्तर्गत गत जेठ ६ गते देखि १२ गते सम्म उक्त तालिम संचालन गरिएको गाउँपालिकाले जनाएको छ ।