सोलुदुधकुण्डका वडाहरुमा सार्वजनिक सुनुवाई शुरु, वडा नम्बर ६ को प्रगति ९० प्रतिशत

जेठ १४, सोलुखुम्बु । सोलुखुम्बुको सोलुदुधकुण्ड नगरपालिकामा सुशासन प्रबर्धन गर्ने उद्देश्यले वडा कार्यालयहरुको सार्वजनिक सुनुवाई शुरु भएको छ । वडा नम्बर ६ को कार्यालयबाट सार्वजनिक सुनुवाईको सुरुवात गरिएको हो । वडा कार्यालयको आयोजना तथा रेडियो एभरेष्टको सहजिकरणमा भएको कार्यक्रममा वडा अध्यक्ष फुर्वाग्याल्जेन शेर्पाले चालु आर्थिक बर्षको हालसम्मको प्रगति विवरण सार्वजनिक गर्नुभएको छ ।
वडाको सभाहलमा सरोकारवालहरुको विचमा भएको कार्यक्रममा वडा अध्यक्ष शेर्पाले वडाका योजनाहरुको काम ९० प्रतिशत सम्पन्न भएको जानकारी दिनुभयो । वहाँले वडाको ४१ लाखको बजेटमा १२ वटा योजना संचालन गरिएकोमा अब एउटा मात्रै योजनाको काम बाँकी रहेको बताउनु भयो । वहाँले चालु आर्थिक बर्षको हालसम्मको अवधिमा १४ लाख ३३ हजार राजश्व संकलन गर्न सफल भएको बताउनु भयो । शिक्षा, सडक र उद्यमशिलतालाई प्राथमिक्ता दिएर काम गरिरहेको भन्दै वडा अध्यक्ष शेर्पाले युवा रोजगारी सिर्जनको क्षेत्रमा पनि काम भईरहेको जानकारी दिनु भयो । सेवा प्रवाह सम्बन्धि जानकारी दिँदै वहाँले अहिले सम्म ७ सय ९४ वटा सिफारिस गरिएको उल्लेख गर्नु भयो ।
नगरपालिकाका शाखा अधिकृत रामकुमार खड्काले पारदर्शीता र जबाफदेहीतामा नगरपालिका सदैव अगाडि रहेको भन्दै जनताको निति निर्माण तहमा सहभागिताको लागि सबै वडामा सार्वजनिक सुनुवाई सुरु गरिएको धारणा राख्नु भयो । कार्यक्रममा एक दर्जन भन्दा बढी सरोकारवालाले विकास निर्माण र सेवा प्रवाहका बारेमा प्रश्न र सुझाव राखेका छन् । सहभागि बक्ताहरुले वडाको नेतृत्वले सबैलाई समेटेर कार्य सम्पादन गरिरहेको भन्दै आगामि बर्षको योजना तथा बजेट निर्माणका लागि सुझाब दिएका छन् । कार्यक्रमको सहजिकरण रेडियो एभरेष्टका पत्रकार भानुभक्त निरौलाले गर्नु भएको थियो ।