‘पान उत्कृष्ट नगरपालिका पुरस्कार २०८२’ हलेसी तुवाचुङलाई

जेठ १४, सोलुखुम्बु । खोटाङ जिल्लाको हलेसी तुवाचुङ नगरपालिकाले शिक्षा क्षेत्रमा पुर्‍याएको योगदानको उच्च मूल्याङ्कन गर्दै ‘पान उत्कृष्ट नगरपालिका पुरस्कार २०८२’ प्राप्त गर्ने भएको छ । नेपालका प्रधानाध्यापकहरूको संस्था ‘प्रिन्सिपल्स एसोसिएसन अफ नेपाल’ (पान) ले प्रत्येक वर्ष प्रदान गर्दै आएको यो राष्ट्रिय पुरस्कार यसपटक हलेसी तुवाचुङ नगरपालिकालाई प्रदान गरिने भएको हो ।

संघका अध्यक्ष सुदाम प्रसाद गौतमका अनुसार, शिक्षा क्षेत्रमा देखाएको नेतृत्व, प्रतिबद्धता र नवीन पहललाई सम्मानस्वरूप पुरस्कार प्रदान गरिन लागिएको हो । २५ शैक्षिक मापदण्डका आधारमा प्रा.डा. विद्यानाथ कोइरालाको नेतृत्वमा गठित छनोट समितिले मूल्याङ्कन गरी हलेसी तुवाचुङलाई कोशी प्रदेशकै उत्कृष्ट पालिकाका रूपमा सिफारिस गरेको थियो । यो पुरस्कार जेठ २३ गते पोखरामा आयोजना हुने पानको दोस्रो राष्ट्रिय सम्मेलनमार्फत प्रदान गरिनेछ ।

‘नेतृत्वका नयाँ परिभाषास् विद्यालय उत्कृष्टताका लागि परिवर्तनको अगुवाई’ भन्ने मुल नाराका साथ आयोजना हुने सम्मेलनमा देशभरका शिक्षाविद्, नीति निर्माता, शिक्षक, विद्यार्थी, प्रधानाध्यापकलगायत एक हजारभन्दा बढीको सहभागिता रहनेछ । नगरप्रमुख विमला राईका अनुसार, उक्त पुरस्कार प्राप्त गर्नु हलेसी तुवाचुङ नगरपालिकाका लागि गर्वको विषय हो । स्थानीय आवश्यकता र समयको मागअनुसार नगरपालिकाले शैक्षिक गुणस्तरमा सुधार ल्याउने प्रयासलाई निरन्तरता दिइरहेको बताइएको छ ।

नगरपालिकामा रहेका ९० वटा निजी तथा सामुदायिक विद्यालयमध्ये पछिल्लो तीन वर्षमा सामुदायिक विद्यालयहरूमा उल्लेखनीय सुधार देखिएको छ । यस अवधिमा २६ वटा आरसीसी भवन निर्माण, २८ वटा विद्यालयको भवन मर्मत तथा व्यवस्थापन, कक्षाकोठा व्यवस्थापन, प्रयोगात्मक सिकाइ केन्द्र स्थापना, बालमैत्री संरचना निर्माण, पुस्तकालय तथा शौचालय व्यवस्थापन, शिक्षक तालिम र विद्यालय अनुगमनजस्ता कार्यक्रम प्रभावकारीरूपमा सञ्चालन भएका छन् ।

दिवाखाजा, छात्रवृत्ति, प्रविधियुक्त शिक्षण कार्यक्रम विस्तारजस्ता पहलहरूले हलेसी तुवाचुङको शैक्षिक क्षेत्रको विकासमा महत्त्वपूर्ण योगदान पुर्‍याएको छ । शिक्षालाई प्राथमिकतामा राख्दै नगरपालिकाले छोटो समयमा नै जिल्लाभरि शैक्षिक सुशासन र गुणस्तर सुधारमा फड्को मारेको छ ।