अख्तियार सचिवले सोलु आएर भने–धेरै कर्मचारी र जनप्रतिनिधि थुन्ने अख्तिायरको टार्गेट होईन

जेठ १४, सोलुखुम्बु । अख्तियार दुरुपयोग अनुसन्धान आयोगका सचिव नारायणप्रसाद शर्मा दुवाडीले धेरै कर्मचारी र जनप्रतिनिधिलाई छानि छानि थुन्ने आयोगको लक्ष्य नभएको बताउनुभएको छ । अख्तियार दुरुपयोग अनुसन्धान कार्यालय बर्दिवासले सोलुखुम्बुको सदरमुकाम सल्लेरीमा आयोजना गरेको भ्रष्टाचार नियन्त्रण र सुशासन प्रबर्धन विषयक अन्तरक्रिया कार्यक्रममा सचिव दुवाडीले भ्रष्टाचार निर्मुल गर्ने आयोगको लक्ष्य रहेको भन्दै सोही अनुसार निर्मम भएर आयोगले काम गरिरहेको बताउनुभयो ।
उहाँले प्रविधिको बढ्दो विकाससँगै डिजिटल करेन्सि र डिजिटल कारोबारबाट घुस लिने दिने क्रम शुरु भएको र अनुसन्धानमा थप चुनौती थपिएको सचिव शर्माको भनाई छ । ‘घुस लेनदेन पनि अब नगदमा होईन डिजिटल माध्यममा हुने गरेकोछ’ सचिव शर्माले भने, ‘कार्यकारी तहबाट मात्रै अब भ्रष्टाचार नियन्त्रण सम्भव छ’ । उहाँले स्थानीय तहलाई भ्रष्टाचार नियन्त्रणको टार्गेट नै बनाएर बार्षिक कार्यक्रम गर्न सुझाव दिनुभयो । कार्यक्रममा अख्तियार प्रबक्ता तथा सहसचिव राजेन्द्रकुमार पौडेलले आयोगको रणनैतिक योजना र सम्पत्ति सुद्धिकरणको कसुरको अनुसन्धान बारे प्रस्तुति दिनुभएको छ ।

                              जिल्ला समन्वय समितिका प्रमुख कृष्णप्रसाद निरौलाले कर्मचारी तन्त्रमा आकर्षक र मालदार कार्यालय मात्रै रोज्ने परिपाटी भ्रष्टाचार नियन्त्रणको भयानक चुनौति रहेको भन्दै यस महारोगको अन्त्यका कानुनि र नैतिक दुवै जिम्मेवारी बहन गर्नु पर्ने धारणा राख्नुभयो । सोलुदुधकुण्ड नगरपालिकाका मेयर नाम्गेलजाङ्बु शेर्पाले स्थानीय तहको नेतृत्व ईमान्दार भए भ्रष्टाचार कम हुने भन्दै सम्पत्ति शुद्धिकरणको अनुसन्धानमा अख्तियार कठोर भएर लाग्नु पर्ने सुझाब दिनुभयो ।
अख्तियारका सहसचिव तथा बर्दिवास कार्यालयका प्रमुख रामबहादुर कुरुम्वाङले भ्रष्टाचारको न्युनिकरण र प्रबर्धनका लागि सबै पक्षको सहयोग जरुरी रहेको भन्दै गल्ति गर्ने कसैलाई नछाड्ने बताउनुभयो । जिल्लाका सबै स्थानीय तहका प्रतिनिधि, सरकारी कार्यालयका प्रमुख तथा प्रतिनिधि सहभागि कार्यक्रममा जिल्लाको अख्तियारमा परेका मुद्दाहरुको बारेमा जानकारी गराईएको थियो । चालु आर्थिक बर्षको हालसम्मको अवधिमा जिल्लाबाट ४५ वटा उजुरी परेकोमा २८ वटा फछ्र्यौट भईसकेको र १७ वटा अनुसन्धानको क्रममा रहेको आयोगले जनाएको छ ।