बाकाचोलको वडा बहस सम्पन्न, वडाको विकासले छलाङ मारेको अध्यक्ष तामाङको भनाई

जेठ १४, खोटाङ । खोटाङको ऐसेलुखर्क गाउँपालिका वडा नम्बर २ बाकाचोलको वडा बहस कार्यक्रम सम्पन्न भएको छ ।  गाउँपालिकाको आयोजना तथा रेडियो एभरेष्टको सहजिकरणमा आयोजित कार्यक्रम वडा नम्बर २ को कार्यालय बाकाचोलमा सम्पन्न भएको हो ।  

शुसासन प्रवर्द्धन र नागरिक खबरदारीका लागी आयोजित उक्त कार्यक्रममा वडा कार्यालयले विगत ३ वर्षदेखि गरेका कार्यक्रम तथा सम्पन्न गरेका योजना भावी रणनीतिका बारेमा अध्यक्ष नन्द कुमार तामाङले प्रस्ट पार्नुभएको थियो ।  उहाँले नागरिकले कार्यक्रममा उठाएका प्रश्नहरूका जवाफ दिँदै आफु निर्वाचित भएपछि वडामा खानेपानीको समस्या समाधान गर्न सफल भएको, वडा कार्यालयको प्रशासनिक भवन निर्माण सम्पन्न गर्न सकेको, वडामा सुशासन कायम गर्न सकेको लगायत विषय उल्लेख गर्नुभएको थियो ।  बाकाचोलमा कृषि क्षेत्रको विकास गर्न सके आत्मनिर्भरतामा पर्याप्त सम्भावना रहेको उल्लेख गर्नुभएको थियो ।

कृषि क्षेत्रमा विकास गर्न वडा लागी परेको भएपनि बसाइँसराई लगायतका कारण जनशक्ति अभाव भएको उहाँको भनाई छ ।  कार्यक्रममा उहाँले नागरिकका आशा र अपेक्षालाई सीमित रुपमा पुरा गर्न सकिएको महसुस भएको भन्दै कार्यान्वयन गर्न सकिने मात्र प्रतिबद्धता गरिएको स्मरण गर्नुभयो । वडामा शिक्षा क्षेत्रको विकास गर्नका लागी विद्यालयको भौतिक संरचना पर्याप्त निर्माण गरिएको तर विद्यार्थी घट्दो सङ्ख्यामा रहँदा यसले चुनौति थपिएको उल्लेख गर्नुभयो ।

कार्यक्रममा वडाका सदस्यहरु, वडा सचिव, कर्मचारी, वडा स्थित विभिन्न विद्यालयका प्रधानाध्यापक, तथा सरोकारवाला स्थानीयको मनग्य उपस्थिति रहेको थियो । कार्यक्रमको सहजिकरण रेडियो एभरेष्टका समाचार शाखा प्रमुख पत्रकार दिपेन्द्र खनालले गर्नुभएको थियो ।