सगरमाथाको शिखरमा चौथो पटक वाङ्डा शेर्पाको सफल आरोहण

जेठ १४, सोलुखुम्बु । ओखलढुंगाको मोलुङ गाउँपालिका–७, पात्ले सुर्के निवासी वाङ्डा शेर्पाले जेठ १० गते बिहान ९ बजेर ९ मिनेटमा चौथो पटक विश्वको सर्वोच्च शिखर सगरमाथाको सफल आरोहण गर्नुभएको छ । यसपटकको आरोहण विशेष बनेको छ, किनभने वाङ्डा शेर्पाले “पशु बलिको परम्परालाई अन्त्य गरौं, शाकाहारी जीवनशैली अपनाऔं, अहिंसा र करुणाको मार्ग नै सच्चा शान्तिको बाटो हो” भन्ने सन्देश बोकेर हिमालको चुचुरोसम्म पुग्नुभएको हो ।

शेर्पा परिवार तथा स्थानीय बासिन्दाले वाङ्डाको सफल आरोहणलाई गौरवको विषय मानेका छन् । उहाँका बुबा गेल्जे शेर्पा, आमा सर्किनी शेर्पा, श्रीमती ङिम्फुटी शेर्पा, छोरी छिरिङ फुटी शेर्पा, छोरा टाशि शेर्पा, छोरा दावा शेर्पा तथा समस्त शेर्पा परिवारले उहाँको सफलताको लागि हार्दिक बधाई तथा गर्व व्यक्त गर्नुभएको छ ।

वाङ्डा शेर्पाको यो अभियानले न केवल साहस र दृढताको प्रतीक प्रस्तुत गरेको छ, तर साथसाथै सामाजिक सचेतना र पर्यावरणीय चेतनाको सन्देश पनि फैलाएको छ । उहाँको समर्पणले भावी पुस्तालाई सकारात्मक परिवर्तनको प्रेरणा दिने अपेक्षा गरिएको छ ।